Самарқандда Мажбурий ижро бюроси ходими битта ҳужжат ижроси учун кунига 120 километр йўл босишга мажбур бўлмоқда. Бу ҳақда Халқ депутатлари вилоят Кенгашининг етмиш биринчи сессиясида маълум қилинди, — дея «Дарё» мухбири хабар берди.
Бошқарма бошлиғи Меҳрож Насруллаевнинг маълум қилишича, бу ходимларнинг иш фаолияти сифатига, самарасига, ижро муддатларининг риоя қилинишига салбий таъсир кўрсатмоқда.
«Мисол учун, Самарқанд вилоятининг Қўшработ тумани марказидан туманнинг ‘Жонбулоқ’ маҳалласигача бўлган масофа 110 километрни, ‘Тоз’ ва ‘Сориғул’ маҳаллаларигача 75-80 километрни, ‘Равот’ ва ‘Урганжи’ маҳаллаларигача 50-55 километрни ташкил қилади. Ёки Нуробод тумани марказидан ‘Лолазор’ маҳалласигача бўлган масофа 120 километрни, ‘Саҳоба’ маҳалласигача 95 километрни, ‘Қўрғонча’ маҳалласигача 80 километрни ташкил қилади. Ушбу ҳудудлар тоғли ҳудудлар бўлганлиги сабабли ички тошлоқ ва етиб бориш қийин бўлган йўллар орқали борилади. Бюронинг Қўшработ ва Нуробод туман бўлимларида уч нафардан давлат ижрочиси фаолият кўрсатади. Агар бир нафар давлат ижрочисининг шахсий автомашинаси бўлган тақдирда ҳам ушбу ҳудудга бориб битта ижро ҳужжати бўйича ижро ҳаракатини амалга ошириш учун бир кун вақти кетади», — дейди Меҳрож Насруллаев
Таъкидланишича, айни пайтда МИБнинг вилоят бошқармасида жами 200 нафар давлат ижрочиси фаолият олиб бормоқда. Бир давлат ижрочисининг иш юритувида ўртача 1638 тадан ижро ҳужжати мавжуд.
Қўшимча қилинишича, 2022 йилнинг ўтган 6 ойида тамомланган, яъни якуний қарор қабул қилинган 121 минг 720 та ижро ҳужжати давлат ижрочиларига тақсимланганда, бир ойда ҳар бир давлат ижрочисига ўртача 101 тадан иш тўғри келган.
Изоҳ (0)