Samarqand viloyati Adliya boshqarmasi aralashuvi bilan Samarqand shahar hokimligi tadbirkorning buzilgan savdo do‘koni uchun 925 million 181 ming 352 so‘m kompensatsiya to‘lab beradigan bo‘ldi. Bu haqda “Daryo” viloyat adliya boshqarmasi Jamoatchilik bilan aloqalar bo‘limi ma’lum qildi.
Xabar berilishicha, tadbirkorga Samarqand shahar hokimining 2011-yil 14-fevraldagi qarori bilan Registon maydoniga tutash hududda joylashgan qurilish osti maydonidan 161 kv/metrdan iborat savdo do‘koni binosini foydalanishga qabul qilish dalolatnomasi tasdiqlangan hamda ushbu binolar tadbirkorga xususiy mulk qilib berilib, doimiy foydalanish huquqi bilan biriktirilgan.
Biroq, oradan olti yil o‘tgach, Samarqand shahar hokimining 2017-yil 17-apreldagi “Yo‘lbarslar xiyoboni hududida joylashgan jismoniy va yuridik shaxslarga tegishli bo‘lgan savdo do‘koni binolarini buzish to‘g‘risida”gi qarori bilan tadbirkorga tegishli 160,47 kv/metr savdo do‘koni buzilgan. Hokimlikning 2017-yil 28-apreldagi “Buzilishga tushgan maishiy savdo do‘kon binolari uchun tovon tariqasida yer maydoni ajratish va qurilishga ruxsat berish to‘g‘risida”gi qarori bilan tadbirkorning buzilishga tushgan savdo do‘koni o‘rniga mutanosib ravishda yer maydoni ajratib berish nazarda tutilgan. Samarqand shahar arxitektura va qurilish bo‘limiga yer tanlash dalolatnomasini rasmiylashtirish va yer maydonini naturada o‘lchab berish vazifasi yuklatilgan. Ammo davlat kadastrlari palatasi viloyat boshqarmasining 2021-yil 3-noyabrdagi xatida fuqaro Z.Sodiqovning buzilgan savdo do‘koni o‘rniga ajratilgan yer maydoni to‘g‘risida ma’lumot mavjud emasligi ma’lum qilingan.
Shuningdek, “Afrosiyob baho” MCHJ tomonidan 2017-yil 29-mart kuni tadbirkorning buzilgan savdo do‘koni 493 million 805 ming so‘mga baholangan. Bundan tashqari, Markaziy bank Samarqand viloyat bosh boshqarmasining 2021-yil 17-noyabrdagi ma’lumotida O‘zbekiston Respublikasida inflyatsiya ko‘rsatkichi hisoblab chiqilib, buzilgan savdo do‘koni inflyatsiya ko‘rsatkichi bilan umumiy qiymati 925 million 181 ming 352 so‘mni tashkil etishi bayon qilingan.
Tegishli qonun hujjatlari talablaridan kelib chiqib, da’vogar Z.Sodiqovning yer uchastkasi davlat ehtiyoji uchun olib qo‘yilib, undagi qurilishlar buzilishi munosabati bilan shahar hokimligi da’vogarga yetkazilgan har qanday zararni to‘liq qoplab berishi lozim bo‘lgan.
Sud mazkur ish yuzasidan to‘plangan hujjatlarni o‘rganib chiqib, Samarqand shahar hokimining 2017-yil 28-apreldagi qaroriga asosan tadbirkorga tovon tariqasida ajratilgan 160,47 kv/metr yer maydoni o‘rniga Samarqand shahar hokimligidan jami 925 million 181 ming 352 so‘m kompensatsiya va 1 million 200 ming so‘m davlat boji undirish to‘g‘risida qaror qabul qildi.
Izoh (0)