Сўнгги пайтларда турк сериаллари машҳурлик чўққисига эришгани барчага маълум. Баъзида уларнинг муваффақиятли чиқишида сюжет эмас, балки чиройли кўринишга эга бош қаҳрамонлар сабаб бўлиши мумкин. Бу мавзу ҳақида гап кетганда кўплаб мухлисларни турк актрисаларининг гўзаллиги борасидаги сир қизиқтиради.
Ҳанде Эрчел
«Эшигимни қоқ» сериалидаги бош роли билан танилган Ҳанде Эрчел ўз фаолиятини халқаро гўзаллик танловида иштирок этиш билан бошлаган. Актриса ушбу танловда иккинчи ўринни эгаллаган. Ўшанда у 19 ёшда бўлган ва айнан шу ғалаба унга ўзини ўзи қадрлашида сезиларли таъсир кўрсатган ва ўзига бўлган ишончни янада мустаҳкамлашга ёрдам берган.
Актриса Instagram саҳифасига жойлаган ҳар бир сурат обуначиларининг минглаб изоҳига сабаб бўлади. Сўнгги пайтларда Ҳанде Instagram саҳифасидаги 23 миллион обуначисини ёрқин фотосуратлар билан хурсанд қилмоқда, бу ажабланарли ҳолат эмас, чунки у спорт билан мунтазам шуғулланади ва қандай овқатланиши ҳақида ҳам мухлисларини хабардор қилиб туради.
Фаҳрие Эвжен
Фаҳрие Эвжен «Чолиқуши» сериалидаги ижроси орқали дунё бўйлаб машҳурликка эришди. Актриса ташқи кўриниши устида йиллар мобайнида ишлаган ва бунинг учун бир қанча одатларни шакллантирган. Фаҳрие Эвжен ҳозир ҳам шу одатларсиз кунини тасаввур қила олмайди. Бу одатлар кўп ухлаш ва тўғри овқатланишни ўз ичига олади, актриса ҳеч қачон кундалик машғулотларини ҳам унутмайди.
Фаҳрие ўз устида ишлашни ва руҳий ҳолатига ғамхўрлик қилишни муҳим деб билади, чунки асаб бузилиши ва ташвишли ҳолатлар ташқи кўринишга ҳам таъсир қилади. Актрисанинг сўзларига кўра буни ҳеч қандай косметик манипуляциялар билан яшириб бўлмайди.
Актриса гўзаллиги ҳақида гап кетганда, сочлари ва терисини парвариш қилиш учун намловчи, ёғли, табиий маҳсулотларни афзал кўришини айтган. Табиий гўзалликни ёқтирадиган Фаҳрие Эвжен баъзида кўзларига урғу бериб, ёрқин бўяниб кўриниш беради.
Неслиҳан Атагул
Неслиҳан Атагул ёшлигидан суратга олиш ишларида қатнашган ва эпизод роллари учун мухлислар томонидан эътироф этилган. Бунга эса актрисанинг ғайриоддий ва унутилмас кўриниши сабаб бўлиши ҳам мумкин.
Актриса камдан-кам ҳолларда бўянади ва ундан кўра терини парваришлайдиган маҳсулотларини афзал кўради. Бундан ташқари, Неслиҳан ҳар доим табиий маҳсулотлардан фойдаланади. Унинг соч ва тери соғломлиги учун ишлатадиган севимли маҳсулотлари арган ёғи ва асал ниқобидир. Шунингдек, ҳозир 29 ёшда бўлган актриса тўғри овқатланишга ва ухлаш давомийлигига ҳам эътибор беради.
Марям Узерли
Марям Узерли «Муҳташам юз йил» сериалидаги роли сабаб Туркиянинг энг машҳур актрисаларидан бирига айланди. Муваффаққиятли бўлган лойиҳанинг суратга олиш жараёнида актриса вазн ортиши билан боғлиқ муаммога дуч келди. У ортиқча вазндан халос бўлиш учун жуда кўп ҳаракат қилиши керак эди. Ҳозир актриса ҳаётини спорт машғулотларисиз ва тўғри овқатланишсиз тасаввур қила олмайди.
Сериалдаги қаҳрамони қизил сочлари билан танилганига қарамай, реал ҳаётда Марям бу рангни ёқтирмас эди ва суратга олиш ишлари тугагач, у табиий рангдаги соч бўёқларидан фойдалана бошлайди.
Ўзгача кўриниши туфайли Узерли бир қатор таниқли брендларнинг «юзи»га айланган. Бироқ актриса кўпчиликнинг фикрига қўшилмайди ва ҳаттоки ўзини гўзал деб ҳисобламаслигини айтган.
Бергузар Корел
Ҳозирда 39 ёшда бўлган «Минг бир кеча» телесериалининг юлдузи Бергузар Корел ёрқин кўринишга эга. Бунинг сири эса актрисанинг органик маҳсулотларни тўғри танлаши ва овқатланиш режимида мева, сабзавотларнинг кўплигидир. Актриса ҳатто суратга олиш майдончасида ҳам одатларини унутмайди, яъни ўзи билан олиб кетадиган овқатларни олдиндан тайёрлаб қўяди. Бергузар бўш вақтини спорт ва рақсга бағишлашни афзал кўради.
Мавзуга доир:
- Турк киносининг таниқли актёр ва актрисалари ҳамда машҳурликда улардан қолишмайдиган фарзандлари (фото)
- Энг машҳур турк актрисалари пластик операциядан аввал ва кейин (фото).
- Юқори дид билан кийинадиган турк актрисалари рейтингида Фаҳрие Эвжен биринчиликни қўлга киритди
- Томошабинлар меҳрига сазовор бўлган энг гўзал турк актрисалари (фото).
Изоҳ (0)