Беларусь президенти Александр Лукашенко сентябрь ойида Самарқандда бўлиб ўтадиган Шанхай ҳамкорлик ташкилоти (ШҲТ) саммитида иштирок этишни режалаштирмоқда. Бу ҳақда президент матбуот котиби Наталя Эйсмонтга таяниб, «Интерфакс» хабар берди.
Аввалроқ Шанхай ҳамкорлик ташкилоти бош котиби Чжан Мина Беларусь ШҲТга аъзо бўлиш учун ариза топширгани, ҳозирда республика ташкилотда кузатувчи давлат мақомига эга эканини маълум қилганди. Республикани ШҲТ аъзолигига киритиш тартибини бошлаш тўғрисидаги қарор 15—16 сентябрь кунлари Самарқандда бўлиб ўтадиган саммитда қабул қилинади.
ШҲТ — 2001 йилда ташкил этилган халқаро ташкилот бўлиб унинг аъзолари Ўзбекистон, Қозоғистон, Қирғизистон, Хитой, Ҳиндистон, Россия, Тожикистон, Покистондир. ШҲТда кузатувчи давлатлар – Афғонистон, Беларусь, Эрон ва Мўғулистон, ҳамкор давлатлар эса – Озарбайжон, Арманистон, Камбоджа, Непал, Туркия ва Шри-Ланка.
Изоҳ (0)