Владимир Зеленский хавфсизлик кучлари билан йиғилиш ўтказди, у махфий тусга эга бўлди, деб хабар берилади Украина президенти сайтида. Мажлисда Украина Қуролли кучлари, разведка, Мудофаа вазирлиги, ИИВ, Украина Хавфсизлик кенгаши ва «бошқа мудофаа кучлари» раҳбарияти қатнашди.
«Махфий режимда ўтказилган йиғилиш иштирокчилари фронтдаги тезкор вазият ҳақида маълумотларни тинглади, хавфсизлик ва мудофаа соҳасидаги бошқа масалаларни кўриб чиқди. Украина армияси эҳтиёжларига ва Украинанинг халқаро шериклари билан турли даражалардаги координацияларга алоҳида тўхталиб ўтилди», — дейилади хабарда.
Шунингдек, мажлис давомида «олий бош қўмондоннинг дастлабки буйруқлари ижро этилиши» кўриб чиқилди.
Украинада операция бошланганидан буён россиялик ҳарбийлар Херсон вилоятини, Запорожье вилоятининг катта қисмини, Харьков вилоятининг бир қисмини, Донецк вилоятининг ярмини ва бутун Луганск вилоятини назорат остига олди.
Киев май ойидан буён эҳтимолий қарши ҳужум ҳақида гапирмоқда. Дастлаб Зеленскийнинг офиси мамлакат июль бошигача ҳужумга тайёр бўлишини айтган бўлса, июль ўрталарига келиб, жанговар зирҳли техника ва ҳаво ҳужумига қарши мудофаа тизимларига ҳамон эҳтиёж борлигини маълум қилиб, ҳозирча ҳужум қилолмаслигини айтди.
Украина мудофаа вазири Алексей Резников июлда Зеленский қарши ҳужум режасини ишлаб чиқишни топширганини даъво қилганди. Мудофаа вазирлиги Разведка бош бошқармаси вакили Вадим Скибицкий августда тайёргарлик ишлари давом этаётганини маълум қилди.
Бироқ The Washington Post газетаси Украина ҳукуматининг исми ошкор этилмаган маслаҳатчисига таяниб, Украина қарши ҳужум учун ҳозирча етарли қурол-яроғ захирасига эга эмаслиги ҳақида ёзди. «Аввалгидек, натижага эришиш мумкин, аммо шундай бўлса, бу Россия билан тенг кучли қарама-қаршилик эмас, балки Украинанинг оқилона стратегияси натижаси бўлади», — деди у.
Изоҳ (0)