Екатеринбург собиқ мэри армияни «обрўсизлантиргани» учун қўлга олинди

Россиянинг Екатеринбург шаҳри собиқ мэри Евгений Ройзман армияни обрўсизлантирганлик ҳақидаги жиноят иши бўйича қўлга олинди, деб ёзади Meduza.

«280-модда, учинчи қисм. Иш Москвада», — дея сиёсатчи ўз хонадони деразасидан бақириб маълум қилган журналистларга.

ОАВлар маълумотларига кўра, гап РФ Жиноят кодексининг 280.3-моддаси (Қуролли кучлардан фойдаланишни обрўсизлантиришга қаратилган ошкора ҳаракатлар) ҳақида бормоқда. Ушбу модда бўйича иш очилиши учун, одам «обрўсизлантириш ҳақидаги маъмурий модда билан жаримага тортилган ва бир йил ичида шунга ўхшаш қоидабузарликни амалга оширган бўлиши керак. У бўйича максимал жазо — беш йилгача озодликдан маҳрум қилиш.

«ТАСС» манбасига кўра, Ройзманга нисбатан жиноят иши унинг YouTube-каналига жойланган видео туфайли қўзғатилган.

Полициячилар Ройзманни 24 август куни эрта тонгда қўлга олган. Ушбу жараён акс этган видеони Mash Telegram-канали эълон қилди.

Видеода камида олти нафар ниқоб таққан хавфсизлик ходимлари турар жой подеязига кириб, Ройзманнинг хонадонига чиққан, у эшикни очган. Куч органлари ходимасининг тинтув ўтказиш ва жиноят иши қўзғатилиши ҳақидаги гапларидан кейин видео тугаган.

Сиёсатчининг ёрдамчиси Лейла Гусанованинг сўзларига кўра, Ройзман томонидан очилган музайга ва «Евгений Ройзман фонди» офисига ҳам тинтув ўтказиш учун келишган. СИёсатчининг адвокати Владислав Идамжапов ўз мижози билан кўриша олмаётганини айтган.

2022 йил март апрелида Евгений Ройзман Россия ҳарбийларини обрўсизлантирганлик ҳақидаги маъмурий модда бўйича уч марта жаримага тортилган эди. Протоколлар тузиш учун унинг твити, Telegram’даги пости ва видеодаги гаплари сабаб бўлган.

Май ойида Ройзманга Россия ташқи ишлар вазири Сергей Лавровнинг баёноти ҳақидаги твити туфайли «ҳукуматга ҳурматсизлик» учун яна 85 минг рубль жарима солинган.