Украинанинг Қозоғистондаги элчиси Пётр Vрублёвский қозоғистонлик блогер Диас Кузаировга берган интервьюсида айтган гаплари учун республика Ташқи ишлар вазирлигига чақирилди, деб ёзади «РБК». У ушбу интервьюда Украинанинг мақсади — иложи борича кўпроқ русларни ўлдириш эканини айтганди.
«Қозоғистон томонидан бундай баёнотлар чет давлат элчиси фаолиятига мувофиқ келмаслиги ва номақбуллиги ҳақида позиция билдирилди. Бундай хатти-ҳаракатлар давлатлар ўртасидаги дўстона алоқаларга зарар етказмаслиги керак», — дейилади Қозоғистон ТИВ хабарида.
Vрублёвскийнинг интервьюсидан парча 22 август куни Россия ТИВ расмий вакили Мария Захарованинг Telegram-каналида эълон қилинди. Ушбу видеода Vрублёвский Украина «иложи борича кўпроқ русларни ўлдирмоқчилигини» айтган. Шунингдек, у: «Ҳозир биз русларни қанчалик кўп ўлдирсак, фарзандларимиз ўлдириши учун улар шунчалик кам қолади», — деган.
«Бундай гапни фақат террорчилик режими элчисигина айтиши мумкин. Саккиз йил давомида Киев нацистлари жимгина қотиллик қилиб, ҳамма нарсада Москвани айблаб келганди, энди эса миллий тозалаш режалари ҳақида баралла айтилмоқда», — дея изоҳ берди Захарова.
Қозоғистон Халқ ассамблеяси — республика президенти ҳузуридаги маслаҳат-мажлис органи элчининг баёнотини қоралади. «Тинчлик ва бирдамлик давлат сиёсати ва жамоат ҳамжиҳатлигининг бош тамойиллари бўлган мамлакатимизда бундай гаплар, ким айтишидан қатъий назар, ножоиз ва номақбулдир», — дейилади ассамблея хабарида.
Россия Тергов қўмитаси видеога баҳо бериб, барча иштирокчиларнинг шахсларини текширишини ҳамда уларнинг аввалроқ россиялик ҳарбий хизматчиларга қарши амалга оширилган жиноятларга алоқадорлигини текширишини маълум қилди.
Пётр Vрублёвский — Украинанинг Қозоғистондаги Фавқулодда ва мухтор элчиси.
2020 йилда ушбу лавозимга тайинланишидан олдин у Украинанинг Беларусдаги элчихонасида маслаҳатчи вакил, Украина Вазирлар маҳкамаси котибиятида протокол бошқармаси бошлиғи ҳамда Украина Иқтисодий ривожланиш вазирлиги департаментида Евроиттифоқ билан ҳамкорлик бошқармаси раҳбари бўлиб ишлаган.
Изоҳ (0)