24 август куни Олий Мажлис Қонунчилик палатасининг навбатдаги мажлисида депутатлар фуқароларнинг ижтимоий-иқтисодий, ҳуқуқий соҳалардаги манфаатларини таъминлашга доир бир қатор қонун ва қарор лойиҳаларини кўриб чиқди. Бу ҳақда қуйи палата ахборот хизмати хабар қилди.
Қайд этилишича, халқ вакиллари «Наманган вилоятининг Тўрақўрғон тумани ва Наманган шаҳри Давлатобод тумани, шунингдекб Наманган шаҳрининг чегараларини ўзгартириш тўғрисида»ги Қонунчилик палатаси қарори лойиҳасини муҳокама қилган.
Ўзбекистоннинг 2022–2026 йилларга мўлжалланган тараққиёт стратегиясида Наманган шаҳрини истиқболда «бир миллионлик шаҳар»га, яъни мегаполисга айлантириш, инвестициявий муҳит яхшиланиши натижасида халқаро замонавий брендлар ва йирик компанияларнинг шаҳарга кириб келиши, урбанизация жараёнлари сезиларли даражада тезлашиши, шаҳарнинг «ақлли шаҳар» концепцияси асосида бошқариш тизими яратилиши кўзда тутилган. Шунингдек, Наманган шаҳрида бир йилда аҳолининг ўртача ўсиши 30,3 минг кишини ташкил этиши ҳисобга олинган ҳолда 2040 йилга келиб аҳоли сони табиий равишда 1,2 миллион кишига етиши прогноз қилинмоқда.
Мазкур қарор билан Наманган шаҳрини «миллионли шаҳар»га айлантириш мақсадида унга чегарадош бўлган Тўрақўрғон туманидан472,4 гектар ер майдонини қўшиб бериш, ҳудудда «Янги Наманган шаҳарчаси» замонавий ишбилармонлик маркази ва турар жойлар комплексини ташкил этиш кўзда тутилмоқда.
Қайд этилганидек, ушбу қарорнинг қабул қилиниши аҳолини муносиб иш ўринлари билан таъминлаш мақсадида шаҳардаги мавжуд савдо ва маиший хизмат кўрсатиш объектларида, шунингдек майдони 164,2 гектар бўлган 4 та кичик саноат зонасида 41,0 мингдан ортиқ янги иш ўринларининг яратилишига эришилади.
«Таҳлилларга кўра, ‘миллионли шаҳаръларда бошқа шаҳарга нисбатан иқтисодий ўсиш даражаси юқори бўлади ва аҳоли жон бошига даромад тез ўсади. Иқтисодий тармоқлар диверсификацияси кучаяди ҳамда тармоқ кластерларини ташкил қилиш мумкин бўлади. Айниқса, ‘миллионли шаҳарълар мамлакат ЯИМни ўсишида драйвер вазифасини бажаради», — дейилади хабарда.
Таъкидланишича, мажлисда қарор лойиҳаси қабул қилинган.
Изоҳ (0)