Ижтимоий тармоқларда «Лукойл ишчиларга меҳнат таътили бермаяпти» номли хабар тарқалганди. Бандлик ва меҳнат муносабатлари вазирлиги ҳолат юзасидан маълумот берди.
Қайд этилишича, Бухоро вилояти бандлик бош бошқармаси давлат меҳнат инспекцияси ушбу ҳолатни ўз назоратига олди, ўрганиш натижалари ҳақида қўшимча ахборот берилади.
Маълумот учун, мурожаат депутат Расул Кушербаевга юборилган ҳамда у Бандлик ва меҳнат муносабатлари вазирлигидан масалани ўрганиб чиқишларини сўраган эди. Мурожаат матни қуйида тўлиқ келтирилади.
Ассалому алайкум, ҳурматли Расул Кушербаев. Исм-фамилиямни аноним сақланг, эълон қилманг. Мен «Lukoil Uzbekistan Operating Company» Ҳаузак конида ишлайман. Мен меҳнат қилаётган Назорат-ўлчов асбоблари ва автоматикаси метрология хизмати ишчи ходимларига 3 йилдан буён меҳнат таътили берилмайди. Биз вахта режимида 14/14 кундан хавфли, заҳарли объектларда ишлаймиз. Меҳнат таътили эса дам олиш кунларимизга берилади.Меҳнат қонунчилигида меҳнат таътили берилиши мажбурий экани белгилаб қўйилган бўлса ҳам, россиялик бошлиқларимиз Н.В.Семёнов ва Д.В.Политов ишчиларга таътил бермаяпти. Қолаверса, бошқа соҳаларда ишлайдиган ишчиларга 1 смена учун 11 соат табелга қўйилиб, меҳнат таътили ҳам берилиб, 42 кун дам олади.
Бизнинг ишчиларига 1 смена учун 10,5 соат табелга соат қўйилади. Бошлиқларга ёзма мурожаат қилганимизда сизлар 10,5 соатни ҳам оқламаяпсизлар, ёқмаса, аризангни ёз, деб жавоб қайтаришяпти. Сиздан илтимос, мурожаатимизни бефарқ қолдирманг. Биз ҳам бошқалар сингари таътилга чиқиб, дам олишни хоҳлаймиз, — дейилади аноним мурожаатда.
Изоҳ (0)