Дарья Дугинанинг қотиллиги ортида турганлар фақат унга суиқасд қилишни режалаштирган. Қизнинг отаси, файласуф ва сиёсатшунос Александр Дугин уларни қизиқтирмаган. Бу ҳақда «ТАСС» ҳуқуқ-тартибот органларидаги аноним манбасига таяниб хабар берди.
«Дарья Дугинага нисбатан қотилликни тайёрлаганлар фақат унинг кун тартиби ва одатлари билан қизиққан. Автомобилни масофадан туриб портлатганлар портловчи қурилмани ҳаракатга келтираётиб, машинани Дугина ёлғиз ҳайдаб кетаётганини аниқ билган. Унинг отаси қотилларнинг нишони бўлмаган», — деди агентлик суҳбатдоши.
Дарья Дугина 20 август куни Подмосковьеда отаси билан «Традиция» фестивалидан қайтаётган вақтида Toyota Land Cruiser автомобили портлаши оқибатида ҳалок бўлди. Александр Дугин бошқа машинада кетаётган бўлган ва, ўзининг сўзларига кўра, қизининг ҳалокатига гувоҳ бўлган.
Дугинларнинг танишлари айтиб беришича, портлаган автомобиль файласуфга тегишли бўлган, унинг қизи эса одатда бошқа машинада юрган. Аммо баъзи нашрларга кўра, Land Cruiser Дарья Дугинага тегишли бўлган. Бошқа ОАВлар ёзишича, Дугин фестивалдан қизи билан биргаликда қайтиши керак эди, бироқ сўнгги лаҳзада бошқа автомобилга ўтирган.
ФХХ 22 август куни Дугинанинг ўлдирилиши Украина махсус хизматлари томонидан ташкиллаштирилганини, унинг ижрочиси эса Украина фуқароси Наталья Вовк бўлганини маълум қилди. У 12 ёшли қизи қизи билан Россияга келиб, Дугина яшайдиган уйдан хонадон ижарага олган ва уни кузатган, унинг автомобили масофадан туриб портлатилгач эса, Эстонияга жўнаб кетган. ФХХ хабарида Вовкни Дугиннинг ўзи қизиқтирган-қизиқтирмаганига аниқлик киритилмаган.
Изоҳ (0)