Россия Федерал хавфсизлик хизмати (ФХХ) файласуф ва сиёсатшунос Александр Дугиннинг қизи Дарья Дугинанинг ўлдирилиши билан боғлиқ жиноятни фош қилгани ҳақида хабар берди, деб ёзади Meduza.
Махсус хизмат маълумотларига кўра, «жиноят Украина махсус хизматлари томонидан тайёрланилган ва амалга оширилган». Қотилликда 1979 йилда туғилган Украина фуқароси Наталья Вовк гумонланмоқда, уни ФХХ жиноят ижрочиси деб атади.
Идора маълум қилишича, 23 июль куни Вовк 12 ёшли қизи София Шабан билан бирга Россияга келган. Улар Москвада Дарья Дугина яшайдиган уйдан хонадон ижарага олган. ФХХ қайд этишича, Дугина Mini Cooper автомобили орқали кузатилган, унинг рақам белгилари уч марта — Қозоғистон, Украина ва ДХР рақамларига ўзгартирилган.
Қотиллик юз берган куни, ФХХ версиясига кўра, Вовк ва унинг қизи Дугина фахрий меҳмон сифатида қатнашган «Традиция» адабий-мусиқий фестивалига борган. Дугинанинг автомобили масофадан туриб портлатилгач, Вовк ва унинг қизи Псков вилояти орқали Эстонияга ўтиб кетган.
Кейинроқ ФХХ Дарья Дугинани ўлдиришда гумонланаётган Наталья Вовкнинг видеосини тарқатди. Унда Вовк Россияга кириб келаётгани, Дугина яшайдиган уй подъездига кираётгани ва Россиядан Эстонияга ўтиб кетаётгани акс этган. Шунингдек, роликда Вовк автомобилининг рақамларидан иборат скриншотлар ҳам бор.
Дарья Дугина 20 август куни Москва вилоятида ўзи бошқариб кетаётган автомобиль портлаши оқибатида ҳалок бўлди. Дугинларнинг танишлари айтишича, бу машинадан одатда унинг отаси фойдаланган. ОАВлар ёзишича, ҳодиса версиялари орасида Александр Дугинга суиқасд варианти ҳам бор.
Мавзуга доир: Дарья Дугинанинг машинаси масофадан туриб портлатилган
Изоҳ (0)