АҚШ Афғонистоннинг хориждаги активлари бир қисмини блокдан чиқариш бўйича «Толибон» билан музокараларни давом эттиради, деб ёзмоқда Reuters.
Reuters манбаларига кўра, толибларнинг халқаро ҳамжамият томонидан қўллаб-қувватланган бир қанча талабларга қаршилигига қарамай, АҚШ президенти Жо Байден маъмурияти Афғонистоннинг хорижий активлари бўйича миллиардлаб долларлик музокараларни давом эттирмоқчи.
Ўз навбатида, икки манбанинг АҚШ расмийларига таяниб айтишича, «Толибон» банкда пул ювишга қарши мустақил мониторларни ўрнатишдан бош тортгани туфайли музокаралар қийинлашган.
Афғонистонда қулаган иқтисодиётни барқарорлаштиришга кўмаклашиш ташаббусини давом эттириш тўғрисидаги қарор Вашингтоннинг гуманитар инқироздан хавотири кучайиб бораётганидан далолат беради. Бирлашган Миллатлар Ташкилоти қиш яқинлашиши билан Афғонистондаги 40 миллион аҳолининг деярли ярми кескин очарчиликка дучор бўлишидан огоҳлантирган эди.
АҚШ бошчилигидаги саъй-ҳаракатларнинг марказида Афғонистон марказий банкининг чет элдаги миллиардлаб активларини Швейцария мақсадли фондига ўтказиш режаси ётибди. Бунда тўловлар халқаро кенгаш ёрдамида амалга оширилади ҳамда кўплаб етакчилари АҚШ ва БМТ санкциялари остида бўлган «Толибон»ни четлаб ўтади. Манбаларнинг таъкидлашича, АҚШ расмийлари Швейцария ва бошқалар билан мақсадли фонд режасини ҳам муҳокама қилган.
Байден томонидан мусодара қилинган 3,5 миллиард доллар биринчи ўринда мақсадли фондга ўтказилиши ва Афғонистоннинг Жаҳон банки олдидаги қарзини тўлаш, шунингдек, афғоний пул бирлигини босиб чиқариш, миллий валюта ва паспортларни чиқариш учун ишлатилиши мумкин.
Эслатиб ўтамиз, Афғонистондаги иқтисодий ва гуманитар инқироз 2021 йил 15 августда «Толибон» Кобулни эгаллаб олганидан кейин Вашингтон ва бошқа халқаро донорлар томонидан хориждаги афғон активлари музлатиб қўйилганидан кейин янада оғирлашган.
Изоҳ (0)