Қирғизистон президенти Садир Жапаров 23 августни Россиянинг Уляновск вилояти яқинида юз берган ЙТҲда ҳалок бўлган қирғизистонликлар хотирасига умумий мотам куни деб эълон қилди.
«Россиянинг Уляновск вилоятида содир бўлган воқеа ҳар биримизни даҳшатда қолдирди. Ушбу тузатиб бўлмас чуқур оғриқ барчанинг қалбида акс-садо берди. Юртдошларимиз йўл-транспорт ҳодисасига учрагани ҳақидаги хабарни катта қайғу билан қабул қилдик. Мен ҳалок бўлганларнинг яқинлари дардини тушунаман ва уларга шерикман, уларга ҳозир жуда оғир», — деди Қирғизистон раҳбари ўз мурожаатида.
Жапаров «ЙТҲда ҳалок бўлганлар ва жароҳатланганларнинг оила аъзолари ва яқинларига чуқур ҳамдардлик билдирди», уларни сабрли бўлишга чақирди. Президент бахтсиз ҳодиса оқибатида ҳалок бўлганларнинг яқинларига ёрдам кўрсатилишига ишонтирди.
«Бу масала менинг шахсий назоратим остида бўлади», — деди Жапаров.
Эслатиб ўтамиз, 21 август куни Уляновск вилоятида Новоспасское ва Николаевка аҳоли пунктлари оралиғидаги М-5 трассасида Mercedes микроавтобуси ва иккита юк автомобили тўқнашиб кетган эди. Оқибатда 16 киши ҳалок бўлган, улардан 14 нафари — Қирғизистон фуқаролари. Яна 22 киши жабрланган, улар оғир аҳволда касалхонага ётқизилган.
Изоҳ (0)