Жанубий Корея ва АҚШ Ulchi Freedom Shield деб номланган қўшма ҳарбий машғулотларни бошлади, уларнинг доирасида тўрт йил ичида биринчи марта дала машқлари ўтказилади, деб ёзади «РБК».
Машғулотлар учта босқичдан иборат бўлади: команда пунктлари учун компьютер симуляцияси, дала тайёргарлиги ва фуқаролик мудофааси бўйича машқлар. Дастлаб ҳарбийлар мудофаа қисмини машқ қилади ва КХДР томонидан Сеул аҳоли пунктларига берилган «ҳужумлар»ни қайтаришга тайёрланади. Сўнг улар қарши ҳужумлар бўйича амалиёт ўташни бошлайди.
Манёврларга 16 августдан бери тайёргарлик олиб борилаётган эди, машғулотлар сўнгги йиллардаги энг йиригига айланади ва 1 сентябргача давом этади. Дала машқлари давомида ҳарбийлар 13 хил сценарий бўйича ҳаракатларни машқ қилади. Улар атом электр станцияларида қўлбола портловчи қурилмаларни қидиришни, ярим ўтказгичлар заводидаги ёнғинда тўғри ҳаракат қилишни, банк тармоғи иши тўхтаб қолишига қарши курашишни, аэропортларда терроризмга қарши курашишни ва дронлар ҳужумларини қайтаришни машқ қилади.
Бундай турдаги машғулотлар 2018 йилдан буён фақат компьютер симуляциялари ёрдамида ўтказилган, дея аниқлик киритди Жанубий Корея Мудофаа вазирлиги. Манёврлар бундан аввалги президент маъмуриятининг Пхеньян билан алоқаларни нормаллаштиришга интилишлари туфайли ўтказилмай қўйган. Коронавирус пандемияси ҳам яна бир сабаб бўлган.
Эслатиб ўтамиз, 17 август куни Шимолий Корея Сариқ денгизга қарата иккита қанотли ракета учирди. Бу Жанубий Кореянинг амалдаги президенти Юн Сок Ёль инаугурациясига 100 кун бўлган санада амалга оширилди. Ўша куни аввалроқ у агар КХДР денуклеаризация (ядровий қуролсизланиш)га «қатъий бел боғлагани»ни намоён қилса, Жанубий Корея ўз қўшнисига иқтисодий ва технологик жиҳатдан ёрдам беришини айтганди. Шу билан бирга, Юн Сок Ёль Шимолий Корея ҳукуматига ҳеч нарса хавф солмаслигини таъкидлади.
Изоҳ (0)