AQSH Afg‘onistonning xorijdagi aktivlari bir qismini blokdan chiqarish bo‘yicha “Tolibon” bilan muzokaralarni davom ettiradi, deb yozmoqda Reuters.
Reuters manbalariga ko‘ra, toliblarning xalqaro hamjamiyat tomonidan qo‘llab-quvvatlangan bir qancha talablarga qarshiligiga qaramay, AQSH prezidenti Jo Bayden ma’muriyati Afg‘onistonning xorijiy aktivlari bo‘yicha milliardlab dollarlik muzokaralarni davom ettirmoqchi.
O‘z navbatida, ikki manbaning AQSH rasmiylariga tayanib aytishicha, “Tolibon” bankda pul yuvishga qarshi mustaqil monitorlarni o‘rnatishdan bosh tortgani tufayli muzokaralar qiyinlashgan.
Afg‘onistonda qulagan iqtisodiyotni barqarorlashtirishga ko‘maklashish tashabbusini davom ettirish to‘g‘risidagi qaror Vashingtonning gumanitar inqirozdan xavotiri kuchayib borayotganidan dalolat beradi. Birlashgan Millatlar Tashkiloti qish yaqinlashishi bilan Afg‘onistondagi 40 million aholining deyarli yarmi keskin ocharchilikka duchor bo‘lishidan ogohlantirgan edi.
AQSH boshchiligidagi sa’y-harakatlarning markazida Afg‘oniston markaziy bankining chet eldagi milliardlab aktivlarini Shveysariya maqsadli fondiga o‘tkazish rejasi yotibdi. Bunda to‘lovlar xalqaro kengash yordamida amalga oshiriladi hamda ko‘plab yetakchilari AQSH va BMT sanksiyalari ostida bo‘lgan “Tolibon”ni chetlab o‘tadi. Manbalarning ta’kidlashicha, AQSH rasmiylari Shveysariya va boshqalar bilan maqsadli fond rejasini ham muhokama qilgan.
Bayden tomonidan musodara qilingan 3,5 milliard dollar birinchi o‘rinda maqsadli fondga o‘tkazilishi va Afg‘onistonning Jahon banki oldidagi qarzini to‘lash, shuningdek, afg‘oniy pul birligini bosib chiqarish, milliy valyuta va pasportlarni chiqarish uchun ishlatilishi mumkin.
Eslatib o‘tamiz, Afg‘onistondagi iqtisodiy va gumanitar inqiroz 2021-yil 15-avgustda “Tolibon” Kobulni egallab olganidan keyin Vashington va boshqa xalqaro donorlar tomonidan xorijdagi afg‘on aktivlari muzlatib qo‘yilganidan keyin yanada og‘irlashgan.
Izoh (0)