Экстремал иссиқлик туфайли жаҳон бозорида пахта нархи 30 фоизга ошди, деб хабар бермоқда Bloomberg. Ҳиндистон, Хитой, АҚШ ва Бразилия иқлим ўзгариши сабабли пахта етиштириш билан боғлиқ муаммоларга дуч келмоқда.
Таҳлилчиларнинг баҳосига кўра, кучли қурғоқчилик ва жазирама тўлқинлари Бразилияда пахта ҳосилдорлигини қарийб 30 фоизга, АҚШда эса 28 фоизга камайтирган. Айни пайтда жаҳонда етиштириладиган пахтанинг деярли ярми ушбу мамлакатлар ҳиссасига тўғри келади.
Ҳиндистонда кучли ёмғир ва ҳашаротлар туфайли ишлаб чиқариш шу қадар пасайиб кетганки, мамлакат хориждан хом ашё сотиб ола бошлашга мажбур бўлган. Хитой ҳам об-ҳаво шароити пахта ҳосилини сезиларли даражада қисқартиришидан хавотирда.
Натижада, Bloomberg маълумотларига кўра, пахта нархи 30 фоизга ошган. Хом ашё нархи ўзининг рекорд даражасига 2011 йилда кўтарилган эди. Бозор иштирокчилари пахта нархи 2022 йилнинг иккинчи ярмида барқарорлашишига умид қилмоқда.
Жорий йилда дунёнинг кўплаб мамлакатларида ҳарорат рекордлари қайд этилди. Ҳиндистоннинг айрим ҳудудларида ҳаво ҳарорати 50 даражага етди. Хитой ва АҚШда энг иссиқ кунларда ҳаво ҳарорати 40 даражага етган.
Изоҳ (0)