Украина президенти Владимир Зеленский АҚШ томонидан Россиянинг «махсус ҳарбий операция» бошлаш режалари ҳақида огоҳлантирилганини, аммо бу ҳақда фуқароларга айтмасликка қарор қилганини тан олди. Бу ҳақда у Американинг The Washington Post газетасига берган интервьюсида маълум қилди, шундан кейин мамлакатда мисли кўрилмаган даражада танқидга учради, деб ёзади BBC.
«У АҚШнинг Россия ҳужум қилишни режалаштираётгани ҳақидаги кўплаб огоҳлантиришлари тафсилотларини украиналиклар билан бўлишмагани сабабларини тушунтириб, The Washington Post’га берган изоҳлари шунга олиб келдики, пуфак ёрилиб, уруш бошидан буён мисли кўрилмаган кўламда жамоатчилик танқиди ёғилди», — деб ёзади нашр.
Интервьюда Зеленский ўз қарорини одамлар ваҳимага тушиб, мамлакатдан қочиб кетишидан қўрққани билан изоҳлади. Унинг тушунтиришича, тартибсизлик уруғини сочмаслик ва иқтисодий муаммоларни қўзғатмаслик учун бу хавф ҳақида мамлакат фуқароларига айтиб ўтирмаган. Зеленский шундай рақамларни келтириб ўтди: ҳозир Украина уруш туфайли ойига 5—7 миллиард доллар йўқотмоқда. Бунақа юкламани қиш пайтида ва иситиш мавсумида мамлакат кўтара олмаган бўларди, деб ишонч билдирди президент.
«Кўплаб украинлар Зеленский уларнинг фаровонлигини эмас, иқтисодий аҳволни биринчи ўринга қўйган, деган хулосага келиб, норози бўлди ва агар ҳукумат аҳолини урушга тегишлича тайёрлаганида, кўплаб ҳаётлар қутқарилган бўларди, деб тахмин қилди», — деб ёзади The Washington Post.
Аввалроқ АҚШ президенти Жо Байден Америка разведка хизматлари Вашингтонга олдиндан Россия томонининг Украинада махсус ҳарбий операция ўтказиш режалари ҳақида маълумот тақдим этганини даъво қилганди.
Айни пайтда Зеленский Ғарбдаги шериклар эҳтимолий ҳужум тафсилотларини маълум қилмаганини, у ҳақда «умумий гаплар» гапирганини айтмоқда.
«Ўша вақтда Бёрнс нима дегани ҳақида ҳамма нарсани айтиб беришга тайёр эмасман, аммо ўшанда унинг асосий сигналлари менинг ҳаётимга бўлган таҳдид ҳақида эди. Ва улар биринчи сигналлар эмасди — улар ҳар томондан келиб тушарди, бизнинг махсус хизматларимиздан, чет эллик ҳамкасбларимиздан ва ҳоказо, — деди президент. — Менга ҳеч ким: ‘Қулоқ сол, сен одамларингни ҳозир тайёрлашни бошлашинг керак ва уларга пул ва озиқ-овқат ғамлаб қўйиш зарурлигини айтишинг керак’ демаган…»
У ўзининг қарорини тўғри деб ҳисоблайди ва у ҳужумга тайёргарлик кўришда ёрдам берганини айтмоқда.
Давлат раҳбари АҚШдан ёрдам учун миннатдорлигини билдирди. Бироқ Россия ҳужумини қайтариш учун Украинага иттифоқдошлардан янада кўпроқ ҳажмда қурол-яроғ кераклигини таъкидламоқда.
Изоҳ (0)