Европа Иттифоқи воситачилигидаги музокаралар Сербия ва Косово ўртасидаги тарангликни бартараф эта олмади, деб хабар бермоқда Deutsche Welle.
Сербия президенти Александр Вучич ва Косово бош вазири Албин Курти Брюсселдаги музокараларда келишувга эриша олмади. Шу билан бирга, Европа Иттифоқи ташқи сиёсати раҳбари Жозеп Боррел мамлакатлар музокараларни давом эттиришга келишиб олганини айтди. Унинг қўшимча қилишича, икки Болқон давлати раҳбарлари ўртасидаги музокаралар «яқин кунларда» қайта бошланади.
«Афсуски, биз келишувга эришмадик. Бироқ бу билан муаммоларни ҳал қилишга уринишлар тугамади, яқин кунларда янги музокаралар бўлиб ўтади. Мен таслим бўлмайман... Ечим излашимиз шарт», — дейилади Боррелнинг баёнотида.
Қайд этилишича, музокаралардан олдин ҳам Вучич келишувга эришиш борасида оптимизм кўрсатмаган.
«Қандайдир ечимга умид қилишда давом этсам-да, бунга шубҳа билан қараяпман», — деб ёзган у Twitter’да. Курти эса Косово шимолида баррикадалар ўрнатаётган «ноқонуний серб тузилмалари»ни танқид қилган.
Эслатиб ўтамиз, Сербия ва Косово ўртасидаги таранглик август ойи бошида яна кучайди. Вучич Косово полицияси ярим тунда республикадаги сербларга қарши ҳарбий операция бошлаганини даъво қилди. 1 августдан бошлаб Сербия ҳужжатлари Косовода ўз кучини йўқотиши керак эди.
Бир мунча вақт ўтгач, Косово республикасининг асосан, серблар яшайдиган шимолий ҳудудларида ҳаво ҳужуми сиреналари ишга туширилгани ва аҳоли баррикадалар қура бошлагани ҳақида маълумот пайдо бўлди. Кейинчалик Косово ҳукумати Европа Иттифоқи ва АҚШ элчилари билан маслаҳатлашганидан сўнг Сербия ҳужжатларига тақиқ қўйиш тартибини 1 сентябрга қолдирди.
Маълумот учун, Косово 2008 йилда Сербия таркибидан чиқиб, ўз мустақиллигини эълон қилган. Сербия ҳалигача республика мустақиллигини тан олмайди. Косовони 116 давлат, жумладан АҚШ ва Европа Иттифоқининг аксарият давлатлари тан олган.
Изоҳ (0)