Агар Киев зарур деб ҳисобласа, Украинага Америка томонидан берилган қуроллардан Қримга зарбалар учун фойдаланиши мумкин. АҚШ буни қўллаб-қувватлайди, дея Politico нашрига маълум қилди америкалик юқори мартабали мулозим.
Нашрнинг исми сир қолишини истаган суҳбатдошига кўра, АҚШ Украинани у ўзини ҳимоя қилиши учун қурол-яроғ билан таъминлаган. «Суверен Украина тупроғида улар таъқиб қилишга қарор қилган ҳар қандай нишон — ўзини ҳимоя қилиш», — деди амалдор ва қуролларни қўллаш учун нишонларни Америка танлаб бермаслигини қўшимча қилди.
АҚШ маъмурияти Қрим яриморолини суверен Украинанинг ҳудуди деб ҳисоблайдими, деган саволга амалдор «Қрим — бу Украина», деб жавоб берди.
Худди шу фикрни АҚШнинг НАТОдаги собиқ элчиси, Дональд Трамп маъмуриятида Украина бўйича махсус вакил бўлиб ишлаган Курт Волкер ҳам билдирган.
Қримдаги Россия кучларига ҳужум қилиш Киев атрофидаги, Херсондаги ёки Украина шарқидаги рус армиясига ҳужумдан фарқ қилмайди», — деган у.Ўз навбатида, Украина расмий вакили Киев АҚШнинг Қримдаги нишонларга қарши қурол ишлатишга нисбатан бундай ёндашувидан хабардорлигини билдирган.
9 август куни Қримда Новофедоровка қишлоғи яқинидаги Саки аэродромида қатор портлашлар содир бўлди. 16 август куни Қримнинг Жанкой туманидаги Майской қишлоғида ўқ-дорилар омбори портлади. Маҳаллий аҳолининг сўзларига кўра, Қримнинг Симферополский туманидаги Гвардейское посёлкасида жойлашган ҳарбий аэродромда ҳам бир неча портлаш содир бўлган. 18 август куни Қрим ҳукумати Керчда ҳаво мудофаа тизими ишлагани, Севастопол яқинидаги Белбек аэродроми яқинида эса дрон уриб туширилгани ҳақида хабар берди.
Киев портлашларга алоқадорлигини расман эълон қилмаган, бироқ Украина ва Ғарб ОАВлари аноним манбаларга таяниб, Россия объектлари украиналик ҳарбийлар томонидан ҳужумга учраганини ёзди.
Изоҳ (0)