Россия БМТ бош котиби Антониу Гутерришнинг Россия қўшинлари томонидан эгаллаб олинган Запорожье АЭС атрофидаги ҳудудни қуролсизлантириш ҳақидаги таклифини рад этди, деб ёзади DW.
Запорожье АЭС атрофида қуролсизлантирилган ҳудуд яратиш таклифи «номақбул», чунки бу станцияни янада заиф қилиб қўяди, деди Россия ТИВ вакили Иван Нечаев 18 август, пайшанба куни.
Айни вақтда, у Россия АЭС ҳудудига Халқаро атом энергияси агентлиги (МАGATE) мутахассисларини киритишга рози эканини маълум қилди.
«Энг яқин вақтларда МАGATE экспертлари Запорожье АЭСга боришини кутяпмиз, ушбу ташриф июндаёқ тўлиқ келишилган эди», — деди Нечаев.
Запорожье АЭС — Европадаги энг йирик атом электр станцияси. У Энергодар шаҳрида жойлашган. Март ойидан буён уни ва бутун шаҳарни Россия қўшинлари назорат қилиб келмоқда. Август ойида станция бир неча марта ўққа тутилди. Украина ва Россияда ушбу зарбаларда бир-бирини айбламоқда.
G7 мамлакатлари Москвани зудлик билан АЭС устидан назоратни Киевга қайтаришга чақирди, ушбу даъватни яна 35 та мамлакат қўллаб-қувватлади. БМТ АЭСдан ҳарбийлар ва техникани олиб чиқиб кетишни ва у ерда қуролсизлантирилган ҳудуд яратишни таклиф қилди. Ўз навбатида, Россия назорати остидаги Запорожье вилояти ҳукумати станция атрофида осойишталик режимини эълон қилишни таклиф этди.
Изоҳ (0)