Туркия Адлия вазирлиги мамлакат президенти сайловини 2023 йил 18 июнга белгилади. Унда Ражаб Тоййиб Эрдўғон ўз номзодини қўяди, деди вазирлик раҳбари Бекор Боздаг. Аввалроқ Туркия мухолифати Эрдўғон сайловда қатнаша олмаслигини, чунки бу унинг ушбу лавозимдаги учинчи муддати бўлишини айтганди.
«Туркия президенти сайлови 2023 йил 18 июнда бўлиб ўтади. У бизнинг президентимиз ўз номзодини қўядиган иккинчи сайлов бўлади», — деди Бекор Боздаг Milliyet газетасига берган интервьюсида.
Аввалроқ «Халқ альянси» ҳукмрон блоки (Адолат ва тараққиёт партияси ҳамда ультра ўнг Националистлар ҳаракати партияси киради) Туркия президенти сайлови учун Ражаб Тоййиб Эрдўғонни ягона номзод сифатида илгари суришини маълум қилганди. Бошқа партиялар улардан ким ўз номзодини қўйишини ҳозирча айтгани йўқ.
Сал аввалроқ мухолифат вакиллари Ражаб Тоййиб Эрдўғон 2023 йилдаги сайловда қатнаша олмаслигини, чунки ғолиб бўлган тақдирда, бу у учун учинчи президентлик муддатига айланишини, бу эса мамлакат қонунчилигига зид эканини айтганди. Адлия вазирлиги 2023 йилги сайлов Эрдўғон учун Туркия 2018 йилда бошқарувнинг парламент шаклидан президентлик шаклига ўтганидан кейинги иккинчи сайлов эканини маълум қилди.
Ражаб Тоййиб Эрдўғон 2014 йилда биринчи тўғридан-тўғри президентлик сайловида ғолиб бўлганидан буён ушбу лавозимни эгаллаб келади. 2017 йилда Туркияда конституцияга тузатишлар киритиш ҳақида референдум бўлиб ўтди, улар орасида бошқарувнинг президентлик шаклига ўтиш таклифи ҳам бўлган. Тузатишлар 2019 йилда кучга кириши керак эди, бироқ 2018 йилда Эрдўғон муддатидан олдинги президент ва парламент сайловларини белгилади, уларда ўзи ва «Халқ альянси» ғалаба қозонди.
Изоҳ (0)