Саудия Арабистони суди Twitter’да ҳуқуқ ҳимоячиларининг хабари билан бўлишган фуқаро Салма ал-Шабобни 34 йилга озодликдан маҳрум қилди, деб ёзади Meduza.
Икки фарзанднинг онаси бўлган 34 ёшли ал-Шабоб Буюк Британияда доимий яшаб, Лидс университетида ўқийди. У 2020 йил декабрида таътил пайтида оиласини Буюк Британияга олиб кетиш учун Саудия Арабистонига келган, шундан кейин ҳибсга олинган.
Дастлаб суд ал-Шабобни «веб-сайтдан тартибсизликларни уйғотиш ва жамоат хавфсизлигини беқарорлаштириш мақсадида фойдаланиш» айблови бўйича олти йиллик қамоққа ҳукм қилди — унинг аёллар ҳуқуқлари учун курашган сиёсий маҳбусларни озод этиш ҳақидаги даъватлардан иборат твитлари ҳамда ҳуқуқ ҳимоячилари ёзган шу мазмундаги хабарлар ретвитлари жиноят деб топилди.
2022 йил 15 августда муддат 34 йилгача узайтирилди — аппелляциядан олдин прокуратура тартибсизликлар уюштирмоқчи бўлган шахсларга ёрдам бериш ҳақидаги янги айбловларни қўшди. Шунингдек, аёлга яна 34 йил давомида Саудия Арабистонини тарк этиш тақиқланди. Ал-Шабобда суд қарорига нисбатан яна бир марта апелляция бериш имконияти бор.
The Guardian қайд этишича, ал-Шабоб ҳатто таниқли активист ҳам бўлмаган — унинг Instagram’ига 157 киши, Twitter’ига қарийб 3 минг киши обуна бўлган. Сиёсий постлар унинг Twitter саҳифасида асосий контент бўлмаган — у кўпроқ фарзандлари суратларини жойлаб, ўз ҳаёти ҳақида постлар ёзган.
Ҳукм Саудия Арабистонига биринчи марта АҚШ президенти Жо Байден келиб кетганидан кейин бор-йўғи бир неча ҳафта ўтгач чиқарилди. The Washington Post ёзишича, бу ҳолат Саудия томонидан АҚШ президентига берилган инсон ҳуқуқларига риоя қилиш ҳақидаги ваъдаларнинг барчаси ёлғон эканини кўрсатади. Нашр таҳриррият мақоласида Байденни ҳукмга «қатъий қарши чиқиб», ал-Шабобнинг озод этилишини талаб қилишга чақирди.
The Guardian қайд этишича, ал-Шабоб учун берилган муддат сиёсий фаолларга белгиланган муддатлар орасида максимали бўлди. Нашр эслатишича, Саудия қироллик оиласи турли жамғармалар ва инвестиция компаниялари орқали Twitter компанияси акцияларининг катта қисмини назорат қилади.
Изоҳ (0)