17 август куни Афғонистон пойтахти Кобул шимоли-шарқидаги масжидда юз берган портлаш оқибатида камида 20 киши ҳалок бўлиб, 40 га яқин одам жароҳатлар олди, деб ёзади Asia Plus. «Толибон» ҳодиса юзасидан изоҳ берганича йўқ. Ҳеч қайси гуруҳ ҳозирча воқеа учун жавобгарликни зиммасига олмади.
Кучли портлаш Кобул масжидида кечки пайт намоз чоғида содир бўлган. Хавфсизлик хизмати ходими Al Jazeera нашрига маълум қилишича, портлаш оқибатида 20 киши ҳалок бўлиб, 40 киши жароҳатланган.
Reuters маълумотларига кўра, портлаш Кобулнинг шимолий қисмида юз берган. Толиблар разведкаси вакили аноним тарзда нашрга маълум қилишича, ҳодиса Хайра Хана туманидаги масжидда содир бўлган.
Reuters манбаси қўшимча қилишича, ҳалок бўлганлар орасида масжидга раҳбарлик қилган имом ҳам бор.
Associated Press хабарига кўра, Сиддиқия масжидидаги портлашни худкуш террорчи амалга оширган.
Италиянинг Emergency ноҳукумат ташкилоти 27 киши жароҳат олгани, шуларнинг уч нафари вафот этганини маълум қилди.
Изоҳ (0)