Украина қуролли кучлари Россияни «техноген офат»ни юзага келтиришда айблаш учун Запорожье АЭСда «шов-шувли провокация» тайёрламоқда. Бу ҳақда Россия Мудофаа вазирлиги баёнотида айтилади, деб ёзади Meduza.
Идора қайд этишича, 19 август куни, Украинада БМТ бош котиби Антониу Гутерриш ташриф билан бўлиб турган пайтда, Украина қуролли кучлари 44-артиллерия бригадаси Никополь шаҳрида ўточар позициялардан Запорожье АЭСга зарбалар беради, оқибатлар учун айбни эса Россия ҳарбийлари бўйнига қўяди.
«Украина ҳукумати ушбу атом электр станциясини Россия қўшинлари босиб олгани ҳақида кўп марта миш-мишлар тарқатган, ўзлари эса АЭСни пана қилган ҳолда узоқ масофали артиллерия тизимларидан зарбалар бермоқда. Шу нарсага эътиборни қаратамизки, станция ҳудудида ҳам, унга туташ туманларда ҳам Россия қўшинларининг оғир қурол-яроғлари йўқ. У ерда фақат қўриқчилик бўлинмалари бор», — дейилади Россия Мудофаа вазирлиги хабарида.
Запорожье АЭС — Европадаги энг йирик атом электр станцияси. У Энергодар шаҳрида жойлашган. Март ойидан буён уни ва бутун шаҳарни Россия қўшинлари назорат қилиб келмоқда. Август ойида станция бир неча марта ўққа тутилди. Украина ва Россияда ушбу зарбаларда бир-бирини айбламоқда.
G7 мамлакатлари Москвани зудлик билан АЭС устидан назоратни Киевга қайтаришга чақирди, ушбу даъватни яна 35 та мамлакат қўллаб-қувватлади. БМТ АЭСдан ҳарбийлар ва техникани олиб чиқиб кетишни ва у ерда қуролсизлантирилган ҳудуд яратишни таклиф қилди. Ўз навбатида, Россия назорати остидаги Запорожье вилояти ҳукумати станция атрофида осойишталик режимини эълон қилишни таклиф этди.
Изоҳ (0)