Россия ва Қозоғистон президентлари Владимир Путин ҳамда Қосим-Жўмарт Тўқаев 19 август куни Сочида учрашади, деб хабар қилди «ТАСС» Кремль матбуот хизматига таяниб.
«Мунтазам олий даражадаги мулоқотнинг давоми сифатида Россия—Қозоғистон стратегик шериклик ва ҳамкорлик муносабатларини янада ривожлантириш масалаларини муҳокама қилиш режалаштирилган», — дейилади хабарда.
Бундан ташқари, Кремлнинг қўшимча қилишича, интеграция бирлашмалари, жумладан, Қозоғистон жорий йилда раислик қилаётган Мустақил давлатлар ҳамдўстлиги доирасидаги икки томонлама ҳамкорлик масаласига ҳам тўхталиб ўтилади.
Аввал президентлар июнь ойида Санкт-Петербургда шахсан учрашган, ўшанда Тўқаев Санкт-Петербург Халқаро иқтисодий форумида иштирок этган эди. Шу билан бирга, июль ойида Россия ва Қозоғистон раҳбарлари телефон орқали мулоқот қилиб, савдо-иқтисодий ва энергетика соҳаларида лойиҳаларни изчил амалга оширишга содиқ эканликларини таъкидлаган.
Изоҳ (0)