Россияда премиум қулоқчинлар танқислиги бошланади

Бир қатор премиум минигарнитуралар ишлаб чиқарувчи компаниялар ўз маҳсулотларини Россияга етказиб беришдан бош тортгани сабабли, Россияда чорак охиригача қулоқчин танқислиги юзага келади. Бу ҳақда «Коммерсантъ» хабар берди.

Энг йирик бозорлар вакиллари параллел импорт туфайли уларда етарли миқдорда товар борлигига ишонтирмоқда. Аммо мутахассисларга кўра, бу схема бўйича импорт қилинадиган маҳсулотлар кўпинча қалбаки бўлиб чиқади.

Sennheiser, Marshall, Sony ва бошқа бир қатор компаниялар премиум-сегментли қулоқчинларни мамлакатга етказиб беришни Украинада уруш бошланганидан кейин тўхтатган.

DiHouse’даги «Аксессуарлар» йўналиши бошлиғи Олга Полоновскаянинг сўзларига кўра, чакана сотувчилардаги захиралар тахминан 3 ой учун етарли.

Биз мунтазам равишда мижозлардан JBL, Sony ва бошқа брендларнинг қулоқчинларини етказиб бериш бўйича сўровларни оламиз, жавонларимиз эса аста-секин бўшаб бормоқда, — дейди у.

JBL, Bose, Harman Kardon Россияда ваколатхоналарини ёпди, бошқалар баёнот бермаган бўлса-да, мамлакатга товар жўнатмаяпти, улар орасида Marshall, Sennheiser, Samsung, Sony ҳам бор.

Бу брендларнинг барчасида давлат шартномалари мавжуд эди. Шунинг учун бу компанияларнинг бозордан чиқиб кетиши нафақат расмий дистрибюторларни балки, ҳудудлардаги концерт майдонларининг овоз муҳандисларини ҳам хавотирга солган.

Хитой брендлари, масалан, Edifiyer, аллақачон Sennheiser ўрнини тўлдиришга ҳаракат қилмоқда.