Google фойдаланувчиларни алдагани учун жаримага тортилди

Австралия федерал суди Google’ни 60 миллион Австралия доллари (42,8 миллион доллар) жарима тўлашга мажбур қилди. Бу ҳақда жума куни Австралиянинг рақобат ва истеъмолчилар ҳуқуқларини ҳимоя қилиш давлат комиссияси (АCCC) маълум қилди.

Белгиланган жаримага сабаб қилиб Google компанияси фойдаланувчиларнинг шахсий жойлашув маълумотларини алдагани кўрсатилган. 

Баёнотда айтилишича, Google истеъмолчиларга Android операцион тизими билан ишлайдиган телефонлар томонидан олинган шахсий жойлашув маълумотларини тўплаш ва улардан фойдаланиш бўйича ёлғон ва чалғитувчи маълумотларни тақдим этган. 

Маълум бўлишича, суд Google ‘‘Жойлашув тарихи’’ деб номланган хусусият қурилманинг геолокацияси ҳақидаги шахсий маълумотларни тўплаш ва сақлашнинг ягона йўли деб ҳисоблаб, Австралия истеъмолчилар қонунчилигини бузган деб топган. 

Комиссия раиси Гина Касс-Готтлиебнинг айтишича, Google ноқонуний равишда тўпланган шахсий маълумотлардан контекстли реклама кўрсатиш ва фойдаланувчиларга таъсир қилиш учун фойдаланган. 

Эҳтимол, компаниянинг баъзи мижозлари жойлашув маълумотларини тўплаш, сақлаш ва улардан фойдаланиш бўйича бошқача танлов қилган бўларди, лекин Google уларни бу имкониятдан маҳрум қилди, — деди у.

Тахминан 1,3 миллион австралиялик фойдаланувчилар Google компаниясидан жабр кўрган.

Австралия давлат комиссияси синов бошланганидан кейин Google вазиятни тўғирлаш учун маълум чоралар кўрганини, аммо зарар аллақачон етказилганлигини таъкидлади.