«1,4 млрд хитойликнинг душмани бўлиш яхши нарса билан тугамайди». Хитой ТИВ АҚШни огоҳлантирди

Вашингтон АҚШ Вакиллар палатаси спикери Нэнси Пелосининг Тайванга ташрифи натижасида юзага келган кескинликдан фойдаланиб, минтақадаги ҳарбий иштирокини кучайтириши мумкин, деди ХХР ташқи ишлар вазири Ван И.

«Бу нафақат бориб турган ва асоссиз провокация, балки муваффақиятсизликка учраши аниқ бўлган сиёсий майнабозчилик ҳамдир. Тайвань бўғозидаги жорий вазият ҳали ҳам нотинч. Биз огоҳликни сақлаб турибмиз, чунки АҚШ бу муаммодан фойдаланиши ва янада жиддийроқ инқирозни юзага келтириш учун ҳарбий иштирокини кучайтириши мумкин», — деди Ван И.

Ташқи сиёсий идора раҳбари қайд этишича, «АҚШнинг Тайвань масаласидаги мунофиқлиги ва қасддан провокацияси унга Пекин ва дунё ҳамжамияти томонидан бўлган ишончга янада кўпроқ путур етказиши мумкин».

«1,4 миллиарддан зиёд хитойликларнинг душмани бўлиш — яхши нарса билан тугаши мумкин эмас», — дея қайд этди вазир.

Ван И қўшимча қилишича, бошқа мамлакатлардаги бир қатор сиёсатчилар оролнинг мустақиллигини ёқлаб чиқмоқда ва АҚШдан ўрнак олиши мумкин. Ушбу давлатлар ҳукуматлари «вазиятга нотўғри баҳо бермоқда», бу эса уларнинг Хитой билан алоқалари бузилишига олиб келиши мумкин, дея огоҳлантирди дипломат.

«Эҳтиёт бўлинг, баъзи мамлакатлар сиёсий арбоблари АҚШга эргашиши мумкин, бу билан Хитой билан алоқаларнинг сиёсий асосига путур етказади ҳамда БМТ низомига ва Иккинчи жаҳон урушидан кейин шаклланган халқаро тизимга зарба беради», — деди Ван И.

Тайвань атрофидаги вазиятнинг кескинлашуви АҚШ Конгресси Вакиллар палатаси спикери Нэнси Пелосининг оролга ташрифи туфайли юз берди. Ушбу сафардан кейин Хитой Тайвань соҳиллари яқинида катта кўламли ҳарбий машғулотлар бошлади ва оролга қарши санкциялар эълон қилди.