Ашраф Ғани: «Мен ҳали ҳам Афғонистон президентиман»

«Мен Конституция асосидаги президентман ва Афғонистон халқи қонуний асосда ҳокимиятни бошқа бировга топширмагунича, президент бўлиб қоламан», — деди Афғонистоннинг мамлакатдан қочиб кетган президенти Ашраф Ғани ABN каналига берган интервьюсида.

Қарийб 90 дақиқа давом этган интервью чоғида Ашраф Ғани «Мудофаа вазирлиги, АҚШ элчихонаси ва миллий хавфсизлик органлари эвакуацияси ҳақида хабар топганидан кейин Афғонистонни тарк этишга мажбур бўлгани»ни айтди.

Аввалроқ Ғани толиблар ҳали Кобулга кирмасидан олдинроқ Афғонистондан қочиб кетгани хабар берилганди.

Шунингдек, «Толибон» маълум қилганидек, улар Ашраф Ғани Афғонистондан жўнаб кетгани ҳақида хабар топганидан кейин, Вашингтон билан олдиндан маслаҳатлашган ҳолда Кобулга кирган.

Ашраф Ғани сўзларига кўра, Кобулнинг қулаши олдидан истеъфодаги бир қатор америкалик генераллар ва ОАВлар хабарлари афғон армияси руҳини сусайтирган.

Шунингдек, у ўзининг ҳокимиятдаги шериги ва Миллий ярашув олий кенгаши собиқ раҳбари Абдулла Абдуллани, шунингдек, собиқ президент Ҳамид Карзайни кескин танқид қилди, улар ҳамон Кобулда қолмоқда.

Ғани Абдулла Абдуллани Афғонистонда давлат тузуми кучсизлигида айблади, Афғонистонда тинчлик масалалари бўйича АҚШ собиқ махсус вакили Залмай Халилзодни эса «етарли даражада мустақил бўлмаган» шахс деб атади. Ҳозирча улар Ғанининг гапларига жавоб қайтаргани йўқ.

Аммо Карзай ва Абдулла аввалроқ Ғанини Афғонистондан қочиб кетгани учун танқид қилган ва уни ҳокимиятни топшириш ҳақидаги келишувларни бузишда айблаганди.

Залмай Халилзад Ашраф Ғанининг интервьюси эфирга берилишидан олдин Афғонистоннинг PCE/PC хизмати билан суҳбатда Ғани ҳокимиятни топшириш ҳақидаги келишувларнинг бажарилишини таъминламагнини айтганди.

Ғани, шунингдек, толибларнинг бошқарув режими ҳақида фикр билдирди. Унинг айтишича, толибларнинг етакчиси мулла Ҳайбатулла Охунзода «Толибон» гуруҳи асосчиси мулла Муҳаммад Умарчалик таъсирга ва обрўга эга эмас.

Нашр эслатишича, аввалроқ «Толибон» ҳукумати бош вазири мулла Абдулғани Биродар толиблар Ашраф Ғанини ўлдирмоқчи бўлмаганини айтганди. Ушбу баёнот Ғанининг у агар Афғонистонни тарк этмаганида, толибларнинг биринчи бошқаруви чоғида Кобулда осиб ўлдирилган собиқ президент Нажибулланинг тақдири кутган бўлиши ҳақидаги гапларига жавобан айтилганди.

Ўз интервьюсида Ашраф Ғани толибларга нисбатан қуролли қаршилик ҳаракатини қўллаб-қувватламаслигини маълум қилди, бироқ толиблар нотўғри сиёсат олиб бораётгани ва ҳалигача Покистон билан боғлиқ эканлигини таъкидлади.