Бугун, 10 августда Европа Иттифоқи (ЕИ) орқали кўмир ва бошқа қаттиқ қазилма ёқилғиларни ташиш ва Россиядан ЕИга етказиб бериш тўлиқ тақиқланади. Бу ҳақда «Интерфакс» хабар бермоқда.
Шунингдек, Буюк Британия 10 августдан бошлаб Россиядан кўмир импортига тақиқ жорий қилмоқда.
Россияга қарши санкцияларнинг бешинчи пакети доирасида ЕИ мамлакатдан кўмир етказиб беришга эмбарго жорий этди.
ЕИнинг пресс-релизига кўра, Иттифоқ мамлакатларига кўмир импортининг йиллик ҳажми 8 млрд еврони ташкил этади. Улардан тенг ярми Россия томонидан етказиб берилган.
Россияда жорий йилнинг олти ойи давомида кўмир қазиб олиш ҳажми тахминан ўтган йилга тенг, — деган Россия энергетика вазири Николай Шулгинов.
ЕИнинг Россиядан кўмир импортига тўлиқ эмбаргосининг кучга киришини ҳисобга олган ҳолда ҳисобланган прогнозга мувофиқ, 2022 йилда Россияда кўмир қазиб олиш 17 фоизга қисқариши мумкин. Экспорт 30 фоизга қисқариб, 156 млн тоннагача камайиши мумкин.
Россия ҳукумати денгиз портлари орқали кўмир экспортини Осиё-Тинч океани минтақаси мамлакатларига йўналтириш имкониятини ўрганиб чиқмоқда.
2021 йилда Россиядан кўмир экспорти 223 млн тоннани, умумий ишлаб чиқариш 438,4 млн тоннани ташкил этган. Шу билан бирга, Европага кўмир экспорти 50,4 млн тонна бўлган.
Аввалроқ 2022 йилда дунёнинг кўмирга бўлган талаби 8 млрд тоннага етиши ҳақида хабар берилганди.
Изоҳ (0)