Бухоро вилояти Ғиждувон тумани Ички ишлар бошқармаси томонидан 2022 йилнинг 22 июль куни тахминан соат 09:20 ларда Ғиждувон тумани «Кўлижаббор» маҳалласи Кўҳна Найман қишлоғида жойлашган «Шукур Тўхта» фермер хўжалиги дала шийпонида шахси номаълум ёши тахминан 8–11 ойлик чақалоқнинг ташлаб кетилгани тўғрисида хабар берилган эди.
Бухоро вилояти ИИБ, ҳудудий ички ишлар органлари ва бошқа ҳуқуқни муҳофаза қилувчи идоралар ҳамда кенг жамоатчилик билан ҳамкорликда олиб борилган тезкор қидирув ва тергов ҳаракатлари давомида чақалоқнинг 2022 йил январь ойида туғилган Н.М. экани ва онасининг шахси аниқланиб, тергов органига топширилди.
Ҳозирги кунда Ғиждувон тумани ИИБ Тергов бўлими томонидан ҳолат юзасидан Жиноят кодексининг 25/117-моддаси 1-қисми билан жиноят иши қўзғатилиб, дастлабки тергов ҳаракатлари олиб борилмоқда.
«Дарё»га вилоят ИИБ матбуот хизмати раҳбари Шуҳрат Жалоловнинг маълум қилишича, боланинг онасини топиш учун олти ойдан бир йилгача бўлган муддат давомида фарзандли бўлган аёлларнинг қон таҳлили олинган.
Изоҳ (0)