Бутун дунё бўйлаб қарийб 2,92 миллион интернет фойдаланувчилари турли нуқталардан АҚШ Конгресси Вакиллар палатаси спикери Нэнси Пелоси самолётининг Тайванга парвозини кузатиб борди, деб ёзади «ТАСС» Flightradar сервиси сайтига таяниб.
Унинг маълумотларига кўра, 708 мингга яқин одам самолётнинг Тайбэй аэропортига қўнишини кузатган.
Ҳар иккала рақам ҳам сервис тарихидаги мутлақ рекордлар ҳисобланади.
Чақирувчи номи SPAR19 бўлган Boeing C-40C 2 август, сешанба куни Куала-Лумпурдан учиб кетган. Унинг парвози қарийб етти соат давом этиб, маҳаллий вақт билан 22:44 да (Тошкент вақти билан 19:44 да) Суншань аэропортига қўнган.
Пелосининг Тайванга ташрифи сўнгги 25 йил ичида америкалик юқори мансабли сиёсатчининг илк сафарига айланди. Пекин АҚШни ташриф амалга ошса, у оқибатсиз қолмаслиги, Хитой қатъий чоралар кўриши ҳақида огоҳлантирганди.
Пелосининг самолёти Тайбэй аэропортига қўнганидан кейин Хитой орол яқинида ўт очишлар орқали ҳарбий машғулотлар бошлади. Бундан ташқари, Тайвандан шимолда, жануби-ғарбда ва жануби-шарқда сув ва ҳаво ҳудудида ҳам машқлар ташкил қилинади. Вакиллар палатаси спикерининг ташрифидан аввал ҳам Хитой ҳукумати мамлакат қўшинлари «қўл қовуштириб ўтирмаслиги»га ваъда берган эди. Пекин иқтисодий чоралар ҳам кўрди: 3 августдан ҳукумат Тайванга табиий қум етказиб беришни тўхтатди ва оролдан цитрус мевалар, икки хилдаги балиқ маҳсулотлари импортини тақиқлади.
Пекин 1949 йилда Хитойдан мустақил бўлиб ажралиб чиққанини эълон қилган оролни ўз ҳудуди деб ҳисоблайди. Хитой ҳукумати Пелосининг ташрифини кескин танқид қилиб, Пелоси атайлаб провокация уюштиргани ва «ягона Хитой» тамойилини бузганини маълум қилди.
Изоҳ (0)