Америка делегацияси Вашингтоннинг оролни қўллаб-қувватлашга содиқлигини тасдиқлаш учун Тайванга келди, дея маълум қилди АҚШ Конгресси Вакиллар палатаси спикери Нэнси Пелоси.
«Конгресс делегациясининг Тайванга ташрифи АҚШнинг динамик тарзда ривожланаётган Тайвань демократиясини қўллаб-қувватлашга содиқлигидан гувоҳлик беради», — деди Пелоси.
Унинг қўшимча қилишича, америкалик конгрессменларнинг оролга ташрифи АҚШнинг Тайванга нисбатан сиёсатига тўлиқ мос келади.
Пелосининг сўзларига кўра, мамлакат раҳбарияти билан музокараларда делегация АҚШ ва Тайваннинг умумий манфаатларига оид масалаларни, шунингдек, Ҳинд-Тинч океани минтақасининг очиқлиги ва эркинлигини мустаҳкамлашни муҳокама қилади.
«Американинг 23 миллион Тайвань аҳолиси билан ҳамжиҳатлиги бугунги кунда ҳар қачонгидан муҳимроқ, чунки дунё автократия ва демократия ўртасида танлов қаршисида турибди», — деди Пелоси оролга келганидан кейин.
The Washington Post нашрида унинг оролга ташрифи бошланганидан кейин эълон қилинган мақоласида Пелоси маҳаллий ҳукуматнинг демократияга содиқлигини юқори баҳолади ва Хитойни орол атрофидаги кескинликни кучайтиришда айблади.
«Хитой Коммунистик партияси томонидан кучаяётган тажовуз қаршисида конгресс делегацияси ташрифи Америка Тайванни қўллаб-қувватлаши ҳақидаги аниқ баёнот сифатида кўрилиши керак», — деб ёзган спикер.
Пелосининг самолёти Тайбэй аэропортига қўнганидан кейин Хитой орол яқинида ўт очишлар орқали ҳарбий машғулотлар бошлади. Бундан ташқари, Тайвандан шимолда, жануби-ғарбда ва жануби-шарқда сув ва ҳаво ҳудудида ҳам машқлар ташкил қилинади. Вакиллар палатаси спикерининг ташрифидан аввал ҳам Хитой ҳукумати мамлакат қўшинлари «қўл қовуштириб ўтирмаслиги»га ваъда берган эди. Пекин иқтисодий чоралар ҳам кўрди: 3 августдан ҳукумат Тайванга табиий қум етказиб беришни тўхтатди ва оролдан цитрус мевалар, икки хилдаги балиқ маҳсулотлари импортини тақиқлади.
Пекин 1949 йилда Хитойдан мустақил бўлиб ажралиб чиққанини эълон қилган оролни ўз ҳудуди деб ҳисоблайди. Хитой ҳукумати Пелосининг ташрифини кескин танқид қилиб, Пелоси атайлаб провокация уюштиргани ва «ягона Хитой» тамойилини бузганини маълум қилди.
Изоҳ (0)