Чилидаги мис кони ёнида улкан ўра пайдо бўлди
Чилидаги Алкапароза мис кони яқинида улкан ўра пайдо бўлди. Бу эса кон раҳбарияти ишни вақтинча тўхтатишга мажбур қилди, деб ёзмоқда La Razon.
Канада компанияси мис қазиб оладиган Алкапароза кони яқинида чуқурлик биринчи марта дам олиш кунлари аниқланган. Дастлаб ўранинг диаметри 25 метрни ташкил этган бўлса, 1 августга келиб у 32 метрга етди. Ўранинг чуқурлиги 64 метрдан ортиқ деб баҳоланмоқда.
SOCAVÓN! Un socavón de aproximadamente 25 metros de diámetro se produjo este sábado en la Mina Alcaparrosa, Tierra Amarilla, #RegiónDeAtacama. Personal de @Sernageomin se constituyó ese mismo día para evaluar la situación y levantar recomendaciones. pic.twitter.com/WfwAwcP9Oc
— Sernageomin (@Sernageomin) August 1, 2022
Чили ҳукумати ўрани ўрганиш учун Миллий геология хизмати ходимларини юборди. Ҳозирча мутахассислар ерда тешик пайдо бўлишини кончилик билан боғлиқ, деб айта олмаяпти. Уларнинг сўзларига кўра, ўра кондан «сезиларли масофа» — тахминан 200 метр узоқликда жойлашган.
Конни бошқарадиган Lundin Mining компанияси маълум қилишича, ишчилар ва яқин атрофдаги аҳоли жабрланмаган. Энг яқин турар жой биноси ўрадан 600 метр узоқликда, энг яқин аҳоли пункти эса ундан бир километр узоқликда жойлашган.
