AQSH Kongressi Vakillar palatasi spikeri Nensi Pelosining samolyoti harakatini Flightradar24 servisi orqali 250 mingdan ortiq odam kuzatdi, deb yozadi “RBK”. 2-avgust kuni kechqurun uning samolyoti Taybeyga qo‘ndi. 25 yil ichidagi birinchi amerikalik yuqori mansabli siyosatchi qanday kutib olingani haqida “RBK” fotoreportaj tayyorladi.
2022-yil iyulida AQSH Vakillar palatasi spikeri Nensi Pelosining Tayvanga ehtimoliy tashrifi haqida ma’lum bo‘ldi. 26-iyul kuni Xitoy Mudofaa vazirligi vakili Tan Kefey tashrif “yagona Xitoy” tamoyilini jiddiy buzishi va Xitoy-Amerika munosabatlariga ta’sir o‘tkazishini ta’kidladi.
AQSH Vakillar palatasi spikerining samolyoti mahalliy vaqt bilan 22:45 da (Toshkent vaqti bilan 19:45 da) Taybeydagi Sunshan aeroportiga kelib qo‘ndi.
Nensi Pelosini Tayvan tashqi ishlar vaziri Jozef Vu va AQSHning Tayvandagi vakili Sandra Oudkirk kutib oldi. 3-avgust kuni ertalab u prezident Say Inven bilan uchrashishi kutilmoqda.
Taybeyga uchib kelganidan keyin Pelosi o‘z Twitter’iga: “Bizning tashrifimiz AQSH Tayvanni — mustahkam, yorqin demokratiyani va bizning Hind-Tinch okeani mintaqasidagi muhim sherigimizni qo‘llab-quvvatlashini tasdiqlaydi”, — deb yozdi.
Tayvan aholisining amerikalik siyosatchi tashrifiga munosabati turlicha bo‘ldi. Sunshan aeroporti yaqinida Pelosini olqishlash maqsadida uning tarafdorlari to‘plandi. Odamlar “AQSH, Tayvan, xush kelding, Nensi” deb qo‘lda yozilgan plakatlarni ko‘tarib olgan.
Singapur nashri taybeylik jarroh Mayk Changning gaplarini keltirib o‘tdi: “Agar Pelosi xonim qo‘nishga qaror qilsa, Xitoy havodan hujum qilishi mumkinligi haqida odamlar gapirayotgandi… bundan juda xavotir olayapman”.
Amerikaning mudofaa siyosati bo‘yicha Cato Institute tahlil markazining tadqiqotlar bo‘yicha direktori Erik Gomes fikricha, tashrif “bo‘g‘ozning har ikkala tarafiga nisbatan yanada yirikroq va tashvishliroq voqealarning shov-shuvli bir qismidir”.
AQSH Vakillar palatasi spikerining Tayvanga ehtimoliy tashrifiga javoban Xitoyning “Lyaonin” va “Shandun” avianosets (samolyotlar uchishi va qo‘nishi uchun moslangan harbiy kema)lari dengizga kirdi.
“Sinxua” ma’lumotlariga ko‘ra, 2-avgust kuni Xitoy armiyasi Tayvan oroli yaqinidagi dengiz va havo hududlarida jangovar o‘q-dorilardan foydalanib harbiy mashg‘ulotlar boshlagan. Amerikalik harbiylar ham Tayvanga yaqin joyga o‘z avianosetslari va samolyotlarini joylashtirgan.
Izoh (0)