Nensi Pelosi Tayvanga tashrifi maqsadini ma’lum qildi

Amerika delegatsiyasi Vashingtonning orolni qo‘llab-quvvatlashga sodiqligini tasdiqlash uchun Tayvanga keldi, deya ma’lum qildi AQSH Kongressi Vakillar palatasi spikeri Nensi Pelosi.

“Kongress delegatsiyasining Tayvanga tashrifi AQSHning dinamik tarzda rivojlanayotgan Tayvan demokratiyasini qo‘llab-quvvatlashga sodiqligidan guvohlik beradi”, — dedi Pelosi.

Uning qo‘shimcha qilishicha, amerikalik kongressmenlarning orolga tashrifi AQSHning Tayvanga nisbatan siyosatiga to‘liq mos keladi.

Pelosining so‘zlariga ko‘ra, mamlakat rahbariyati bilan muzokaralarda delegatsiya AQSH va Tayvanning umumiy manfaatlariga oid masalalarni, shuningdek, Hind-Tinch okeani mintaqasining ochiqligi va erkinligini mustahkamlashni muhokama qiladi.

“Amerikaning 23 million Tayvan aholisi bilan hamjihatligi bugungi kunda har qachongidan muhimroq, chunki dunyo avtokratiya va demokratiya o‘rtasida tanlov qarshisida turibdi”, — dedi Pelosi orolga kelganidan keyin.

The Washington Post nashrida uning orolga tashrifi boshlanganidan keyin e’lon qilingan maqolasida Pelosi mahalliy hukumatning demokratiyaga sodiqligini yuqori baholadi va Xitoyni orol atrofidagi keskinlikni kuchaytirishda aybladi.

“Xitoy Kommunistik partiyasi tomonidan kuchayayotgan tajovuz qarshisida kongress delegatsiyasi tashrifi Amerika Tayvanni qo‘llab-quvvatlashi haqidagi aniq bayonot sifatida ko‘rilishi kerak”, — deb yozgan spiker.

Pelosining samolyoti Taybey aeroportiga qo‘nganidan keyin Xitoy orol yaqinida o‘t ochishlar orqali harbiy mashg‘ulotlar boshladi. Bundan tashqari, Tayvandan shimolda, janubi-g‘arbda va janubi-sharqda suv va havo hududida ham mashqlar tashkil qilinadi. Vakillar palatasi spikerining tashrifidan avval ham Xitoy hukumati mamlakat qo‘shinlari “qo‘l qovushtirib o‘tirmasligi”ga va’da bergan edi. Pekin iqtisodiy choralar ham ko‘rdi: 3-avgustdan hukumat Tayvanga tabiiy qum yetkazib berishni to‘xtatdi va oroldan sitrus mevalar, ikki xildagi baliq mahsulotlari importini taqiqladi.

Pekin 1949-yilda Xitoydan mustaqil bo‘lib ajralib chiqqanini e’lon qilgan orolni o‘z hududi deb hisoblaydi. Xitoy hukumati Pelosining tashrifini keskin tanqid qilib, Pelosi ataylab provokatsiya uyushtirgani va “yagona Xitoy” tamoyilini buzganini ma’lum qildi.