Ўзбекистонда 2022—2024 йилларда жами 1082 гектар майдонда янгидан «яшил жамоат парклари» барпо этилади. Бу ҳақда АОКАда ўтказилган брифингда Ўрмон хўжалиги давлат қўмитаси ахборот хизмати раҳбари Отабек Ашуров маълум қилди.
Унинг билдиришича, Ўзбекистон умумий ер майдонининг 7,3 фоизини ўрмон билан қопланган майдонлар ташкил этади. Ўрмон фондининг 4,5 миллион гектари ўрмонзорлар майдонидан иборат бўлиб, ўрмон билан қопланган ер майдони 3,3 миллион гектардан иборат.
Ўрмон хўжалиги давлат қўмитаси тизимидаги давлат ўрмон фондининг қарийб 86 фоизи чўл ҳудудларида жойлашганлиги боис, ўрмонлаштириш тадбирларини жадаллаштириш ҳамда ҳимоя ўрмонзорлари барпо этиш ҳажмларини кўпайтиришни талаб қилади.
Республика ҳудудини янада кўкаламзорлаштириш ва ободонлаштириш, яшил ҳудудларни кўпайтириш мақсадида Қорақалпоғистон Республикаси ва вилоятларнинг 186 та туман ва шаҳарларда 584 гектар майдонда «яшил боғлар», 184 та туман ва шаҳарлардаги 306 та объектларда «яшил жамоат парклари» барпо этилади.
Изоҳ (0)