Афғонистоннинг 2021 йил учун етказиб берилган электр энергиясидан қарздорлиги мавжуд эмас. 2022 йилда ҳам тўловларни амалга ошириб келмоқда, деб хабар берди Энергетика вазирлиги матбуот хизмати.
Қайд этилишича, 2021 йилда Афғонистонга 2 миллион 151,3 минг кВт.соат электр энергияси етказиб берилган бўлиб, Da Afghanistan Breshna Sherkat энергетика компанияси томонидан электр энергияси учун тўловлар тўлиқ амалга оширилган. Яъни 2021 йил учун Афғонистоннинг электр энергиясидан қарздорлиги мавжуд эмас.
«Ўзбекистон миллий электр тармоқлари» АЖ ва Da Afghanistan Breshna Sherkat компанияси ўртасидаги шартномага кўра, Афғонистонга 2022 йилда 2 миллион 210 минг кВт.соат электр энергияси етказиб бериш белгиланган бўлиб, январь—июнь ойларида Афғонистоннинг электр энергиясига бўлган талаб ва эҳтиёжидан келиб чиққан ҳолда 770,2 миллион кВт.соат электр энергияси етказиб берилди.
Бугунги кунда етказиб берилган электр энергияси учун тўловлар компания томонидан доимий равишда амалга оширилмоқда. Ёзги мавсумда Афғонистон Тожикистон энергетика тизимига уланиши сабабли 14 апрелдан Ўзбекистондан электр энергиясини қабул қилиш тўхтаган.
Маълумот учун, 2002 йилдан бошлаб Ўзбекистондан Афғонистонга электр энергияси етказиб борилмоқда. Дастлабки йилларда 10 кВ кучланишли электр узатиш тармоқларидан технологик имкониятларидан келиб чиққан ҳолда Da Afghanistan Breshna Sherkat (DABS) компанияси билан тузилган шартномалар бўйича электр энергияси етказиб берилган.
2009 йилда иккита 220 кВ кучланишли электр узатиш тармоғи қурилиши якунланиб ишга туширилганидан сўнг Афғонистонга 430 МВтгача қувватда электр энергияси етказиб берилмоқда.
Изоҳ (0)