O‘zbekistonda 2022—2024-yillarda jami 1082 gektar maydonda yangidan “yashil jamoat parklari” barpo etiladi. Bu haqda AOKAda o‘tkazilgan brifingda O‘rmon xo‘jaligi davlat qo‘mitasi axborot xizmati rahbari Otabek Ashurov ma’lum qildi.
Uning bildirishicha, O‘zbekiston umumiy yer maydonining 7,3 foizini o‘rmon bilan qoplangan maydonlar tashkil etadi. O‘rmon fondining 4,5 million gektari o‘rmonzorlar maydonidan iborat bo‘lib, o‘rmon bilan qoplangan yer maydoni 3,3 million gektardan iborat.
O‘rmon xo‘jaligi davlat qo‘mitasi tizimidagi davlat o‘rmon fondining qariyb 86 foizi cho‘l hududlarida joylashganligi bois, o‘rmonlashtirish tadbirlarini jadallashtirish hamda himoya o‘rmonzorlari barpo etish hajmlarini ko‘paytirishni talab qiladi.
Respublika hududini yanada ko‘kalamzorlashtirish va obodonlashtirish, yashil hududlarni ko‘paytirish maqsadida Qoraqalpog‘iston Respublikasi va viloyatlarning 186 ta tuman va shaharlarda 584 gektar maydonda “yashil bog‘lar”, 184 ta tuman va shaharlardagi 306 ta obyektlarda “yashil jamoat parklari” barpo etiladi.
Izoh (0)