Россия Федерациясидаги меҳрибонлик уйида тарбияланаётган беш нафар бола Бухорода яшаётган отаси қарамоғига қайтарилди. Бу ҳақда «Дарё»га Миллий гвардиянинг вилоят бошқармаси ахборот хизмати раҳбари Муроджон Раҳматуллаев хабар берди.
Таъкидланишича, Бухоро туманидаги «Кулонхона» маҳалласи, Жизманди қишлоғида яшовчи 45 ёшли фуқаро Шомурод Баракаев 2006 йилда ишлаш мақсадида Россия Федерациясига чиқиб кетган. Бу пайтда унинг хотини ва бир нафар фарзанди бўлган. Орадан кўп ўтмай, аёли билан ажрашган.
Россия Федерациясида иш бошлаган фуқаро москвалик Оксана Кузнецова билан танишган ва турмуш қурган. Улардан 2008 йилда қиз фарзанд — Татьяна Кузнецова Шомуродовна, 2009 йилда — Диана, 2010 йилда — Зарина, 2013 йилда — Толиб ҳамда 2014 йилда Сабрина исмли фарзандлар дунёга келган.
Шомурод Бакаев 2018 йилда Ўзбекистонга депортация қилинган ва Россия Федерациясига кириши тақиқланган. Ҳарчанд уринмасин, фарзандлари ҳолидан хабар ололмаган. Бу орада болаларнинг онаси Оксана Кузнецова эса ўзининг ножўя хатти-ҳаракатлари сабаб қамалган ва оналик ҳуқуқидан маҳрум қилинган. Беш нафар фарзанд эса Россиядаги меҳрибонлик уйига топширган.
Шундан сўнг Шомурод Баракаев фарзандларининг тақдирини ўйлаб, Ташқи ишлар вазирлиги, ИИВ, Миллий гвардия ҳамда Бухоро вилояти ҳокимлигига мурожаат қилиб, болаларининг бағрига қайтарилиши учун ёрдам сўраган.
«Ҳукумат қарори билан хорижда ота-онаси қарамоғидан маҳрум бўлган Ўзбекистон Республикаси фуқароларининг болаларини мамлакатга қайтариш тартиби тасдиқланган ва бу борадаги манзилли ишлар давомий равишда амалга оширилмоқда. Меҳнат муҳожирлари фарзандларининг муаммоларини ўрганиш ва уларга ечим топиш мақсадида Россия Федерацияси ва Ўзбекистон Республикаси ўртасида болалар ҳуқуқ ва манфаатларини ҳимоя қилиш соҳасида ўзаро ҳамкорликлар олиб борилмоқда. Вояга етмаганларни Ўзбекистон ҳудудига олиб келиш учун кўмак сўраган отага ҳукумат томонидан ёрдам кўрсатилди. Беш нафар бола отаси бағрига соғ-саломат қайтарилди», — дейди Муроджон Раҳматуллаев.
Оила вилоят ҳамда Бухоро туман ҳокимлиги, Миллий гвардиянинг вилоят бошқармаси ҳомийлигида озиқ-овқат маҳсулотлари, болалар учун ётоқхона мебеллари ва бошқа зарур жиҳозлар билан ҳам таъминланган.
Маълум бўлишича, Шомурод Баракаев Ўзбекистонга депортация қилингач, 2018 йилда қашқадарёлик фуқаро А.Ж.га уйланган, бир нафар фарзанди бор ва яна фарзанд кутишмоқда.
«Турмуш ўртоғимнинг Россия Федерациясида беш нафар фарзанди қолиб кетганидан хабарим бор эди. Болаларнинг онаси қамалгани ва болаларнинг ўзи меҳрибонлик уйига топширилганини эшитган эрим қаттиқ безовталанди. Уларни ўз бағрига олиб келишини тушунтирди. Мен рози бўлдим. Гоҳида оналик қилармикин, деган гаплар қулоққа чалиниб қолади-да (кулиб) Аммо, боланинг бегонаси бўлмайди, ўз эримнинг болалари, демак, улар менинг ҳам фарзандларим, Аллоҳга шукур», — дейди «Дарё» мухбири билан телефон орқали суҳбатда Наргиза Истамова.
Шомурод Баракаевнинг айтишича, турмуш ўртоғи рус тилини, Россия Федерациясидан бағрига қайтарилган фарзандлари эса ўзбек тилини ўрганмоқда.
Изоҳ (0)