Ўзбекистонда умумий сиғими 991 332 тонна бўлган жами 1 832 та совиткичли омбор мавжуд. Бу ҳақда Қишлоқ хўжалиги вазирлиги матбуот хизмати хабар бермоқда.
Ўзбекистон бўйича:
- Андижон вилоятида 152 555 тонна сиғимга эга 429 та;
- Самарқанд вилоятида 149 230 минг тонна сиғимга эга 160 та;
- Тошкент вилоятида эса 146 620 тонна сиғимга эга 159 та музлаткичли омборлар мавжуд.
Совиткичли омборларнинг асосий мақсади ҳосилни кучли музлатишсиз вақтинча сақлашни таъминлашдан иборат.
Шу орқали қишлоқ хўжалиги маҳсулотларининг йўқотишлари минималлаштирилади. Бу мева ва сабзавотларнинг товар кўриниши ва таъмини сақлашнинг самарали усулидир.
Қишлоқ хўжалигига механизациянинг кенг жорий этилиши ва муайян технологик тартиботларга риоя этиш қишлоқ хўжалиги маҳсулотлари сифати сақлаб қолинишини таъминламоқда.
Тўғри совитиш қоидалари
Ҳосил ҳаво ҳарорати юқори бўлгани туфайли пишиб етилади. Омборга келиб тушган мева ва сабзавотларни тўғри совитиш жуда муҳим: ҳароратнинг кескин пасайиши сифатига салбий таъсир кўрсатиши мумкин.
Мева ва сабзавотлар аввалига вақтинчалик музлаткичлар ёки соя-салқин жойда сақланади.
Олдиндан совитиб олгандан сўнг, улар ичига кимёвий моддалар эритиб солинган сув билан яхшилаб ювилади ва фумигация қилинади, яъни олтингугурт диоксиди билан ишлов берилади.
Бу меваларни зарарсизлантиришга ёрдам беради. Қайта ишланган мева ва сабзавотлар совиткичли камерага ўтказилади.
Олмаларни энг узоқ сақлаш муддати +1 дан +4 градусгача ҳароратда, тахминан, 12 ой, гилосни эса 0 дан +2 градус ҳароратда учун 3–7 кун сақлаш мумкин.
Совиткичли омборхонадаги шароитлар
Бугунги кунда совиткичли омборларда ҳар хил турдаги автоматлаштирилган намлантириш тизимлари қўлланилади.
Бошқариш тугмалари камеранинг ташқи томонида жойлашган бўлиб, нисбий намликни масофадан бошқаришга имкон беради.
Совиткичли омборларда нисбий намликни яратиш ва сақлаш маҳсулотлар намлик миқдорини максимал даражада оширишга ёрдам беради.
Мева ва сабзавотлар учун нисбий намлик уларнинг кимёвий таркибига қараб 80–95 фоизни ташкил қилади.
Бироқ пиёз учун оптимал намлик 65–75 фоиз атрофида бўлиши керак.
Изоҳ (0)