24 февралдан 24 июлгача ўтган беш ой ичида Украинада 5237 нафар тинч аҳоли ҳалок бўлди. Бу ҳақда Бирлашган Миллатлар Ташкилотининг Инсон ҳуқуқлари бўйича Олий комиссари бошқармаси хабар берди.
БМТ маълумотларига кўра, ҳарбий ҳаракатлар пайтида 2019 нафар эркак, 1379 нафар аёл, 143 нафар қиз ва 164 нафар ўғил болалар ҳалок бўлган. Уруш давомида ҳалок бўлган яна 41 нафар бола ва 1491 нафар катта ёшли одамларнинг жинси ҳақида маълумотлар ҳозирча мавжуд эмас.
7035 киши, жумладан 560 нафар бола турли даражада тан жароҳатлари олган.
БМТ тинч аҳоли орасида энг кўп қурбонларни Донецк ва Луганск вилоятларида қайд этди. Ушбу вилоятларнинг Украина ҳукумати назорати остидаги ҳудудларида 2848 киши ҳалок бўлган, 2820 киши яраланган. Россия, ДХР ва ЛХР қуролли кучлари назорати остидаги ҳудудларида эса 241 киши ҳалок бўлган, 940 киши яраланган.
Ўлим ёки жароҳатланиш бўйича қолган ҳолатлар Киев, Черкасси, Чернигов, Харьков, Херсон, Киев вилояти, Николаев, Одесса, Суми, Запорожье, Днепрбўйи, Полтава, Ровно, Винница, Тернопил, Ивано-Франковск ва Житомир вилоятларида қайд этилган.
Тинч аҳоли орасида маълум бўлган ўлимларнинг аксарияти кенг кўламли вайронагарчиликларга сабаб бўлган портловчи қуроллардан фойдаланиш, жумладан, оғир артиллерия ва баравар ўт очиш тизимларидан ўққа тутишлар, ракета ва авиазарбалар оқибатида содир бўлган.
БМТ Инсон ҳуқуқлари бўйича Олий комиссари бошқармасининг қайд этишича, тинч аҳоли орасида қурбонлар сони келтирилган рақамлардан анча юқори, чунки шиддатли жанговар ҳаракатлар содир бўлган жойлардан, жумладан Мариупол, Изюм, Лисичанск, Попасна ва Северодонецкдан маълумот олишнинг имкони йўқ.
Изоҳ (0)