24-fevraldan 24-iyulgacha o‘tgan besh oy ichida Ukrainada 5237 nafar tinch aholi halok bo‘ldi. Bu haqda Birlashgan Millatlar Tashkilotining Inson huquqlari bo‘yicha Oliy komissari boshqarmasi xabar berdi.
BMT ma’lumotlariga ko‘ra, harbiy harakatlar paytida 2019 nafar erkak, 1379 nafar ayol, 143 nafar qiz va 164 nafar o‘g‘il bolalar halok bo‘lgan. Urush davomida halok bo‘lgan yana 41 nafar bola va 1491 nafar katta yoshli odamlarning jinsi haqida ma’lumotlar hozircha mavjud emas.
7035 kishi, jumladan 560 nafar bola turli darajada tan jarohatlari olgan.
BMT tinch aholi orasida eng ko‘p qurbonlarni Donetsk va Lugansk viloyatlarida qayd etdi. Ushbu viloyatlarning Ukraina hukumati nazorati ostidagi hududlarida 2848 kishi halok bo‘lgan, 2820 kishi yaralangan. Rossiya, DXR va LXR qurolli kuchlari nazorati ostidagi hududlarida esa 241 kishi halok bo‘lgan, 940 kishi yaralangan.
O‘lim yoki jarohatlanish bo‘yicha qolgan holatlar Kiyev, Cherkassi, Chernigov, Xarkov, Xerson, Kiyev viloyati, Nikolayev, Odessa, Sumi, Zaporojye, Dneprbo‘yi, Poltava, Rovno, Vinnitsa, Ternopil, Ivano-Frankovsk va Jitomir viloyatlarida qayd etilgan.
Tinch aholi orasida ma’lum bo‘lgan o‘limlarning aksariyati keng ko‘lamli vayronagarchiliklarga sabab bo‘lgan portlovchi qurollardan foydalanish, jumladan, og‘ir artilleriya va baravar o‘t ochish tizimlaridan o‘qqa tutishlar, raketa va aviazarbalar oqibatida sodir bo‘lgan.
BMT Inson huquqlari bo‘yicha Oliy komissari boshqarmasining qayd etishicha, tinch aholi orasida qurbonlar soni keltirilgan raqamlardan ancha yuqori, chunki shiddatli jangovar harakatlar sodir bo‘lgan joylardan, jumladan Mariupol, Izyum, Lisichansk, Popasna va Severodonetskdan ma’lumot olishning imkoni yo‘q.
Izoh (0)