Борис Жонсон Буюк Британия бош вазири лавозимини тарк этишдан олдин Киевга сўнгги марта сафар қилишни режалаштирмоқда. Бу ҳақда манбаларга таяниб, Daily Telegraph хабар берди.
Нашр маълумотларига кўра, Жонсон Украина президенти Владимир Зеленский билан учрашиш ва ўз қўллаб-қувватловини оммавий тарзда эълон қилиш учун Киевга учинчи бор ташриф буюрмоқчи.
«Жонсон Зеленскийнинг энг асосий тарафдори бўлгани учун масъулият юкини чинакамига ҳис қилади. У шунчаки кета олмайди ва дунё унинг ўрнини билинтирмаслигига ишончи комил эмас», — деди исмини ошкор этмаган манба.
Жонсон 7 июль куни истеъфога чиқишини эълон қилганди. Жинсий зўравонликда айбланган депутат Крис Пинчер ҳукумат лавозимига тайинланганидан кейин Борис Жонсон ўз лавозимини тарк этишга мажбур бўлди, чунки Жонсон Пинчерга нисбатан қўйилган айбловлардан хабардор бўла туриб, унинг лавозимга тайинланишига имзо чеккан.
Буюк Британиянинг собиқ молия вазири Риши Сунак ва ташқи ишлар вазири Лиз Трасс янги бош вазир лавозимига даъвогарлик қилмоқда.
Бундан ташқари, Британия бош вазири бир неча бор иттифоқчиларни Украинани қўллаб-қувватлашни кучайтиришга ва бу мавзудан «чарчамасликка» чақирган.
«Ҳозир Украинадан воз кечиш вақти эмас. Буюк Британия Украинани ҳар қадамда қўллаб-қувватлашда давом этади, чунки биламиз — уларнинг хавфсизлиги бизнинг хавфсизлигимиз, уларнинг эркинлиги бизнинг эркинлигимиз», — деган Жонсон июнь охирида.
Изоҳ (0)