Ғарб сиёсатчиларининг Россия президенти Владимир Путинга муносабати номақбул. Бу ҳақда Туркия президенти Ражаб Тоййиб Эрдўғон гапирди.
«Ғарб сиёсатчиларининг Путинга муносабатини биласиз. Бу сиёсатга ярашмайди. Унга қандай муносабатда бўлсангиз, шуни оласиз», — таъкидлади Туркия раҳбари.
23 июнь куни Германия ташқи ишлар вазири Анналена Бербок Эрдўғоннинг россиялик ва эронлик ҳамкасблари Владимир Путин ва Иброҳим Раисий билан биргаликда суратга тушгани Туркия каби НАТО аъзоси бўлган ва Украинага ҳарбий ёрдам кўрсатаётган давлат ҳокимияти вакили нуқтаи назаридан тушунарсиз, деган эди.
«Ушбу суратда Туркия президентининг бўлиши — қарши ҳаракат», — деди у.
Июнь ойи охирида истеъфога чиқишини эълон қилган Буюк Британия бош вазири Борис Жонсон Путинни Индонезиядаги G20 саммитида иштирок этишига шубҳа билдирган эди.
Шу билан бирга у Ғарб давлатларини агар Путин саммитда иштирок этса, тадбирни бойкот қилмаслик ҳақида огоҳлантирди. Жонсоннинг сўзларига кўра, бу Россия ва Хитойга «пропаганда тарқатиш имкониятини беради».
Еврокомиссия раҳбари Урсула фон дер Ляен ҳам агар Путин иштирок этса, тадбирни бойкот қилмаслигини айтди. «Менимча, унинг келиши яхши бўлади, шунда нимани ўйлаётганимизни унинг юзига айтишимиз мумкин бўлади», — деди у.
Кремль матбуот котиби Дмитрий Песков Жонсоннинг баёнотига изоҳ берар экан, Британия расмийларининг баёнотлари Путиннинг саммит ҳақидаги қарорига таъсир қила олмаслигини таъкидлади.
G20 давлатлари раҳбарларининг 17-учрашуви ноябрь ойида Балида бўлиб ўтади. Индонезия G20 нинг ҳозирги раиси ҳисобланади.
Изоҳ (0)