Пентагон АҚШни гипертовушли қуролдан ҳимоя қилиш учун ракета ҳужумига қарши мудофаа тизимини аэростатлар кўринишидаги учар қурилмалар билан тўлдиришни режалаштирмоқда. Бу ҳақда Politico Америка мудофаа идораси ҳужжатларига таяниб хабар берди.
Аэростатлар — парвоз учун қобиқ ичига тўлдирилган газдан фойдаланувчи қурилмалар бўлиб, уларга ҳаво шарлари, дирижабллар, метеорологик зондлар мисол бўла олади.
«Янги режа АҚШга рақобатчилари — Россия ва Хитойни ортда қолдириш имконини беради. 18 дан 27 километргача баландликда ҳаракатланишга қодир бўлган баландда учадиган шиширилма учар қурилмалар кенг кузатув тармоғининг таркибий қисмига айланиши ва истиқболда гипертовушли қуролни кузатиб аниқлашда қўлланилиши мумкин», — деб ёзади газета.
Худди илмий фантастикадек бўлиб кўринадиган бундай режалар ҳақиқат эканини тасдиқлаш учун Politico Пентагон ҳужжатларидаги маълумотларни келтириб ўтди, уларга кўра, 2023 йилда ушбу дастур доирасидаги ишланмаларга 27,2 миллион доллар ажратилади, сўнгги икки йил давомида эса бу мақсадларга 3,8 миллион доллар йўналтирилган.
Пентагон аэростатлар билан қизиқиб қолишига улардан турли мақсадларда фойдаланиш мумкинлиги сабаб бўлган: хусусан, улар «Россия ва Хитой томонидан ишлаб чиқилаётган гипертовушли қуролни қидириб топиши ва тийиб туриши» мумкин, деб ҳисоблайди Politico.
Газета эслатишича, Пентагон бир неча йиллар давомида қуёш энергиясида ишлайдиган баландга учувчи шиширилма учар қурилмаларни маълумотлар тўплаш, қуруқликдаги кучларни алоқа ва коммуникациялар билан таъминлаш соҳасида, шунингдек, муаммолар юзага келган тақдирда, сунъий йўлдошларга таянч бўлиш учун синовдан ўтказган.
Изоҳ (0)