Qora dengizda don yo‘lagini ochish masalasi bo‘yicha muzokaralar davom etmoqda, 7—10 kun ichida natijaga erishish mumkin, deya ma’lum qildi ushbu jarayonda vositachi sifatida ishtirok etayotgan Turkiya prezidenti Rajab Toyyib Erdo‘g‘on Italiya bosh vaziri Mario Dragi bilan muzokaralardan keyin.
“Qora dengizdagi yo‘lak juda muhim. Putin va Zelenskiyning yondashuvlari ham muhim… Biz vositachi bo‘lishda davom etamiz, muzokaralarimizni faollashtirib, ularni bir hafta — o‘n kunda yakunlashga harakat qilamiz”, — dedi Turkiya prezidenti.
Portlarda qolib ketgan qishloq xo‘jalik mahsulotlari hajmlarini tomonlar turlicha baholamoqda: Putin iyun oxirida 5 million tonna don haqida gapirgan bo‘lsa, BMT may boshida 4,5 million tonna, Zelenskiy esa iyun boshida 20—25 million tonna mahsulotlar haqida aytgandi, ular don, makkajo‘xori, arpa, kungaboqar moyini o‘z ichiga oladi.
Anqara iyun o‘rtalarida Ukrainadan don yetkazish muammolarini yechishda vositachi rolini o‘ziga oldi. Oy oxirida Turkiya prezidenti ma’muriyati muloqotlar natijasida Istanbulda don masalasi bo‘yicha operatsion markaz tashkil qilish bo‘yicha konsensusga erishilganini ma’lum qildi.
Bu orada Rossiya prezidenti Vladimir Putin 30-iyun kuni Rossiya ukrain donining olib chiqib ketilishiga to‘sqinlik qilmayotgani, Kiyevning o‘zi portlarni minalardan tozalashi kerakligini aytgandi. “Ukraina harbiy hukumati o‘z portlariga olib boradigan yo‘llarga minalar joylashtirgan, ularga minalarni tozalashga va u yerdan don ortilgan kemalarni chiqarib ketishga hech kim xalal bermayapti”, — deya aniqlik kiritdi Putin.
U, shuningdek, ukrain donini olib chiqib ketishning boshqa yo‘llariga ham e’tibor qaratdi. “Ruminiya, Dunay orqali, undan keyin Qora dengiz, Polsha, Belarus bilan, Azov dengizi portlari orqali”, — dedi Putin.
Rossiya Mudofaani boshqarish milliy markazi boshlig‘i Mixail Mizinsev 1-iyul kuni Kiyev hukumati 16 ta mamlakatdan kelgan 70 ta chet el kemasining ochiq dengizga chiqish yo‘lini to‘sib qo‘yganini ma’lum qildi. “Rasmiy Kiyev tomonidan yaratilgan o‘qqa tutish xavfi va yuqori mina xavfi kemalarga to‘siqsiz ochiq dengizga chiqishga imkon bermayapti”, — dedi Mizinsev.
Uning so‘zlariga ko‘ra, Rossiya Qurolli kuchlari tomonidan ikkita dengiz gumanitar yo‘laklari ishlab turishi uchun zarur sharoitlar yaratilgan, ular kemalar harakati uchun xavfsizdir.
Avvalroq Ukraina prezidenti Vladimir Zelenskiy mamlakat Turkiya va BMT bilan ukrain doni eksporti masalasida muzokaralar olib borayotganini ma’lum qilgan edi.
Izoh (0)