Бугунги кунда бутун дунёда 600 миллиондан ортиқ одам вирусли гепатит Б ва C билан оғрийди ва йилдан йилга касалликнинг тарқалиш тезлиги ортиб бормоқда. Инфексион хавфни минималлаштириш учун вирус юқтиришнинг энг кенг тарқалган йўллари, шунингдек, олдини олиш усулларини билиш муҳимдир.
Гепатит А
Бу гепатитларнинг энг кенг тарқалган ва хавфсиз туридир. Гепатит А сурункали ҳолга келмайди, деярли ҳеч қачон ўлим билан тугамайди ва жиддий оқибатларга олиб келмайди. Ушбу турдаги гепатитдан ўзингизни ҳимоя қилишнинг энг осон йўли эмланишдир.
Гепатит А қандай юқади?
Ушбу касаллик ифлос қўллар касаллиги ҳам дейилади: вируснинг юқиш усули фекал-оғиздир. Бу шуни англатадики, ифлос сув, ювилмаган мева ва сабзавотлар, тоза ювилмаган идиш ёки сирт орқали, шунингдек, касал одам билан алоқа қилгандан кейин юқиши мумкин.
Гепатит Б
Бу касалликнинг энг хавфли туридир. Ҳар йили дунёда деярли 700 минг киши гепатит Б дан вафот этади. Ҳозиргача касаллик қўзғатувчисига бевосита таъсир қиладиган дори мавжуд эмас. Терапия фақат жигарни қўллаб-қувватлашга, сирроз ривожланишини секинлаштиришга қаратилган. Гепатит Б га қарши эмлаш ҳам мавжуд. Бу, биринчи навбатда, қон қуйишга муҳтож бўлганлар, диализ билан оғриган беморлар, сурункали гепатит Б билан касалланганларнинг оила аъзолари, тиббиёт ходимлари ва қон билан ишлайдиганлар, ҳомиладорликни режалаштираётган аёллар, гиёҳванд моддаларни истеъмол қилувчилар учун тавсия этилади. Шунингдек, гепатит Б га қарши эмланиш илгари эмланмаган ва гепатит Б га қарши зарур ҳимоя воситаларига эга бўлмаган ҳар бир киши учун зарур. 35 ёшгача бўлган беморлар А ва Б гепатитларига қарши турар жойидаги поликлиникада бепул эмланиши мумкин.
Гепатит Б қандай юқади?
Гепатит Б вируси қон ва бошқа тана суюқликлари орқали юқади: тупук, сперма, вагинал секрециялар, она сути ва бошқалар. Вирусни юқиши учун жуда оз миқдордаги қон ёки бошқа суюқлик етарли бўлади — устара, маникюр асбобларини қўллашда инфекция бўлиши мумкин.
Гепатит C
Бу касалликнинг энг оғир шакли бўлиб, у «ёқимли қотил» деб аталади. Айнан гепатит C ўлимга олиб келадиган асоратлар — сироз ва жигар саратони билан кечади. Афсуски, бу вирусга қарши эмлаш ҳали мавжуд эмас, шунинг учун профилактика чораларини иложи борича эҳтиёткорлик билан бажариш муҳимдир.
Гепатит C қандай юқади?
Вирус хавфли инъекция ва қон қуйиш орқали юқади. Онадан ҳомилага юқиши жуда кам учрайди. Гепатит C уй шароитида устара ва тиш чўткаларини ишлатиш орқали юқиши мумкин. Маникюр пайтида, стоматологик муолажалар ва ички органларни стерил бўлмаган асбоб-ускуналар билан текшириш пайтида вирусни юқтириш хавфи мавжуд.
Изоҳ (0)