Спорт зали – машқлар қилиб, ортиқча килограммлардан халос бўлиш учун ажойиб жой. Лекин бунга ҳамманинг ҳам имкони бўлмаслиги мумкин. Аслида эса оддийгина кундалик фаолиятингизда ҳам калорияларни самарали йўқотишингиз мумкин.
Зинадан кўтарилиш
Зиналар ҳамма жойда — ишда, уйда, меҳмонхонада бор. 100 калория ёқиш учун зинадан тахминан 15 дақиқа юриш кифоя. Агар тез ҳаракат қилсангиз, 10 дақиқа ҳам етади. Зинадан кўтарилиш пастки тана мушакларни чиниқтиришга ва ёғларни йўқотишга ёрдам беради.
Йўлда телефонда гаплашиш
Иложи бўлса, телефон қўнғироқларига йўлда жавоб беринг. Ҳатто иш пайтида ҳам офис атрофида гаплашиб, айланиб чиқиш мумкин. Қанчалик масофа босганингизни кўриш учун фитнес-трекер ёки шагомердан фойдаланинг.
Уй тозалаш
Уй тозалаш 30 дақиқада тахминан 100 калорияни йўқотади. Ҳар қандай уй ишларини мушакларни мустаҳкамловчи машққа айлантириш мумкин.
Боғда ишлаш
Ҳовлини бегона ўтлардан тозалаш, экиш ва бошқа ишлар 25 дақиқада камида 100 калорияни йўқотади. Тоза ҳавода табиат билан мулоқот қилишдан завқланиш ва тўғридан-тўғри боғдаги янги сабзавотлардан баҳраманд бўлиш соғлиқ учун фойдали.
Болалар билан ўйнаш
Болалигингизни эсланг: қувлашмачоқ, сакрамачоқ, ким ўзарга югуриш — бундай очиқ ҳаводаги ўйинлар болага завқ бағишлайди ва сиз ҳам баҳонада килограммлардан халос бўласиз.
Рақс
Ўзингизни бўш қўйиб, тананинг барча аъзоларини ҳаракатга келтириб рақсга тушишингиз лозим, суст ҳаракатлар сизга ёрдам бермайди.
Сузиш
Албатта, бу фаолиайт билан ҳар куни шуғулланишнинг иложи бўлмаслиги мумкин. Агар курортга борсангиз, завқ билан ва иложи борича кўпроқ сузинг. Имкони бўлса, сув аэробикаси билан шуғулланинг, сув остида тана массажини бажаринг. Бу организмга тушган босимни бартараф этишга ва стресс таъсирини енгишга ёрдам беради.
Изоҳ (0)