Финляндиянинг Россия билан чегара яқинидаги шаҳарларига НАТО базаларининг жойлаштирилиши у ердаги аҳолини зарба остига қўяди, дея маълум қилди Россия Давлат думаси раиси Вячеслав Володин.
Шу тариқа у Финляндиянинг Лаппеенранта шаҳри мэри Киммо Ярванинг маҳаллий аэропортдан НАТО базаларини жойлаштиришда фойдаланиш ҳақидаги таклифига изоҳ берди. Ярва ўшанда Финляндиянинг НАТОга аъзолик истиқболи Жанубий Карелияга умид ва хавфсизлик ҳиссини беришини айтганди.
Бундай фикрни Володин хато деб ҳисоблаб, жанговар ҳаракатлар бошланган тақдирда, зарбалар биринчи навбатда душманнинг ҳарбий объектларига берилишини эслатди.
«НАТО базаларининг жойлаштирилиши Финляндияни ҳам, Швецияни ҳам ҳимоя қилмайди. Аксинча. Ҳарбий инфратузилма жойлашган шаҳарлар аҳолисини зарба остига қўяди», — деб ёзди у Telegram’да.
Финляндия ва Швеция Россиянинг Украинадаги босқини бошланганидан кейин НАТОга кириш истагини билдирди ва май ойида ариза топширди. Уларни қабул қилиш учун НАТОга аъзо барча 30 давлатнинг қўллаб-қувватлови зарур, бироқ Туркия бунга қарши чиқди: у икки давлатни ўз ҳудудида Анқара томонидан тан олинган террорчи Курдистон Ишчилар партияси аъзоларини яширганликда айблади.
28—30 июнь кунлари Мадридда бўлиб ўтган НАТО саммити арафасида уч давлат муросага эришди ва Туркия вето ҳуқуқидан воз кечди, Стокгольм ва Хельсинки расман НАТОга таклиф қилинган давлатлар мақомини олди. Энди уларнинг альянсга кириши иштирокчи мамлакатлар парламентлари томонидан тасдиқланиши керак.
НАТО бош котиби Йенс Столтенберг Финляндиянинг ташкилотга бўлғуси аъзолиги Россия президенти Владимир Путинга альянс эшиклари очиқ қолиши ва у бунинг аксига эришишга уринганига қарамай, Россия чегаралари яқинида энди кўпроқ НАТОни кўриши ҳақида сигнал бўлиб хизмат қилишини қайд этди.
Россия президенти Владимир Путин Швеция ва Финляндиянинг НАТОга кириши Москва хавотирига сабаб бўлмаслигини айтган. Аммо у бундан Россияга таҳдидлар пайдо бўлган тақдирда мамлакат зудлик билан жавоб қайтаришни айтган.
Изоҳ (0)